Мираска милекче хокукы

Мирасны рәсмиләштерүне нәрсәдән башларга?

Беренче нәүбәттә, варис мирас калдыручы вафатыннан соң 6 ай эчендә нотариуска, мирасны ачу буенча варис­лык эшләрен алып барырга тиешле вәкилгә мөрәҗәгать итәргә һәм милекче мираска караган барлык мөлкәткә хокук бирүче документларны тапшырырга тиеш. Әгәр варис шул документларны тәкъдим итә алмый икән, ул вакытта нотариус мираска хокук турында танык­лык бирүдән баш тарта, һәм үз хокукыңны суд тәртибендә исбатларга туры киләчәк.

Мирас калдыручыдан нинди күчемсез милек калуы хакында ничек белергә?
Гомумән күчемсез милек бар микән? Әлеге мәгълүматны мираска хокуклы кеше генә белә ала. Моның өчен нотариуска мөрәҗәгать итәргә кирәк, ул Росреестр Идарәсенә сорау юллый һәм 5 эш көнендә мирас калдыручының мөлкәте турында кәгазь алына. Хокукы булган кеше ул кәгазьне үзе дә соратып алыр­га мөмкин, әмма моның өчен аның варис булуын раслаучы документ кирәк.

Мираска милекче хокукын рәсмиләштерү өчен Идарәгә нинди документлар тапшырырга?
- Гариза. Һәм ул документлар тапшырганда ук языла.
- Гариза бирүченең яки аның вәкиленең шәхесен раслау­чы документ (паспорт). Әгәр вәкил ышаныч кәгазе буенча мөрәҗәгать итсә, ул нотариус тарафыннан расланган бу­лырга тиеш.
- Мираска хокук турындагы таныклык.
- Мирасны бүлү турында киле­шү, әгәр дә ул төзелгән булса.
- Дәүләт пошлинасы түләү турында документ.
Юридик затлар өчен өстәмә рәвештә эшне оештыручы документ таләп ителә.

Дәүләт пошлинасы ничә сум?
Физик затлар өчен (мирас өлешенә бәйсез рәвештә) - 1 мең, юридик затларга 15 мең сум.

Хокук күпме вакыт эчендә теркәлә?
Татарстанда мираска калган милекне дәүләт теркәвенең кыс­картылган вакыты каралган. Ул 5 эш көнен тәшкил итә.

Нигә бу вакыт кыскартылган?
Гражданнарга уңайлы булсын өчен. Еш кына варислар башка шәһәрдә яши­ләр һәм күчемсез милекне рәс­миләштерү вакыты алар өчен зур әһәмияткә ия.