Рәхим итегез!
Тәтеш авыл хуҗалыгы техникумында татар ашлары көне узды.
Биредә иртәдән үк бәйрәмчә кәеф хөкем сөрде. Укытучылар, аш пешерүчеләр, студентлар ашамлыклар әзерләү иҗаты белән шөгыльләнделәр. Әби-бабалары традицияләрен искә төшерделәр, истәлекләре белән уртаклаштылар, күңел җылысын кушып камыр бастылар, токмач кистеләр, татлы эчемлекләр әзерләделәр.
Районда игълан ителгән милли ашлар конкурсына иҗади якын килгәннәр. Матур вакыйганы - туйны нигез итеп алганнар, димәк, өстәлне дә бәйрәмчә әзерләгәннәр. Кунаклар чакырганнар, кулинария рецептлары, әдәплелек турындагы әйтемнәр күргәзмәсе бизәгәннәр, самавыр да үз урынына горур гына менеп кунаклаган. Алып баручылар элекке заманнардан бүгенге көнгә кадәр булган туй мәҗлесе тантаналары турында сөйләделәр, ә милли костюмнар кигән студентлар күңелләргә үтеп керерлек җырлары белән кунакларның күңелләрен күрделәр. Һәм менә табын артындагыларны сыйлаулар башланды. Мул итеп көйләнгән туй өстәлендәге ризыклар чәкчәк, кош теле, гөбәдия, юка, казылык, тутырма, татлы эчемлекләр авыз суларын китерерлек. Бу ашамлыклар - кулинария осталары Диләрә Әхмәтова, Тәнзилә Фазлыева, Фәйрүзә Сабирҗанова, Рушания Хәмидуллина, Резидә Кәлимуллина, Гөлгенә Равиловаларның иҗат эше.
Конкурс комиссиясеннән тыш, аның составында райбашкарма комитеты, милли үзәкләр җитәкчеләре, район иҗтимагый һәм ветераннар советы вәкилләре бар иде, ашамлыкларны татып карарга район башлыгы Валерий Чершинцев һәм башка кунаклар да чакырылганнар.
Беренче карашка гади генә, әмма бик матур тәкъдим ителгән чара һәркемгә чын-чынлап шатлык китерде. Табынның бизәлеше ис китмәле, ашамлыклар, әйткәнемчә, ихластан һәм мул итеп әзерләнгән. Милли ашлар көне бәйрәм өстәле белән генә чикләнмәгән. Бу көнне бөтен техникум ашханәдә татар милли ризыклары белән тукланганнар.
Кунакларга килгәннәре өчен, шушы бай һәм тәмле милли ризыкларны әзерләүчеләргә рәхмәт әйтеп, техникум директоры Марат Фазлыев мондый чараларның барлык милләт кешеләрен берләштерүгә, уртак йортыбызда дуслык һәм тынычлыкны ныгытуга булышлык итүенә басым ясады. Районыбызда бара торган бөтен уңай үзгәрешләр сөендерә, алар да халыклар арасындагы элемтәне ныгыталар, традицияләрне танып-белүне киңәйтәләр.
Бу көнне татарларның өстәл артындагы тагын бер гадәтләрен - кунакларның тезләренә табын әйләнмәсе җәюне искә төшергәннәр. Ул әйтерсең лә җыелып утыручыларны бербөтен итеп, җыр кебек, бәйрәм ахырында аны бергәләшеп башкардылар, берләштерә.
Иң мөһим һәм кызыклы язмаларны Татмедиа Telegram-каналында укыгыз
