Россиягә хезмәт итәргә
Язгы чакырылыш көннәрендә безнең районнан җитмеш егет Ватанга хезмәт итәргә китәчәк.
Гадәттәгечә призывникларга бәйрәм ясау өчен, аларны район мәдәният йортына җыйдылар. Егетләргә уңышлы хезмәт итүләрен теләргә дип район җитәкчеләре, ата-аналары, дуслары, Бөек Ватан сугышы ветераннары, Әфганстан һәм Чечняның утлы юлларын үткән сугышчылар килгәннәр иде.
Райбашкарма комитеты җитәкчесе урынбасары Альберт Гасимов, булачак солдатларны сәламләп, якташларының бай традицияләрен арттыруларын һәм дәвам иттерүләрен теләде, Татарстан Республикасы Президенты Рөстәм Миңнехановның сәламләү хатын укыды. "Армиягә хезмәткә чакырылу - һәр яшь кеше өчен мөһим вакыйга, - диелә анда. - Дәүләт Кораллы Көчләрне ныгытуга, армиядә хезмәт итүнең әһәмиятен һәм абруен күтәрүгә, хәрби хезмәткәрләр өчен лаеклы шартлар тудыруга аерым игътибар бирә. Чынлыкта безнең күз алдыбызда яңа типтагы армия барлыкка килә. Аның никадәр көчле һәм сугышка сәләтле булуы сездән тора..."
Ватанның булачак сакчыларына юл теләкләре белдерүчеләр арасында Ульяннан 31нче гвардия аерым десант-штурм бригадасы командирының тәрбия эшләре буенча ярдәмчесе, подполковник Илүс Зайнагутдинов, ТР Хәрби комиссариатының Тәтеш бүлеге начальнигы Фәнис Гарифуллин, район ветераннар советы рәисе Геннадий Королев бар иде.
Барсының да фикерләре бер, Ватанны саклау - зур җаваплылык, ә армия - чын ирләр мәктәбе һәм аны, якташларың бүгенге сугышчылар белән горурланырлык итеп, намус белән үтәргә кирәк. Өстәвенә, ата-аналарны да онытмаска, аларны борчымас өчен ешрак язарга һәм шалтыратырга.
Светлана Карпова, призывниклар арасында аның да улы бар иде, егетләргә бурычларын намус белән үтәүләрен һәм туганнарын, якыннарын онытмауларын теләде. Ә Александр Карпов барлык чакырылучы егетләр исеменнән җавап сүзе белән чыкты, һәм сынатмабыз, диде.
Мәдәният хезмәткәрләре бәйрәмчә кәеф тантанасы тудырдылар. Булачак солдатлар өчен кадетлар, Ульяннан "Сугышчан дуслык" төркеме җитәкчесе Владимир Кабанов, "Әкият" балалар бакчасында тәрбияләнүчеләр, "Забава", "Сәйлән" җыр ансамбльләре һәм үзешчән сәнгатьтә катнашучы башкалар чыгыш ясадылар.
Чара һәлак булган якташларыбыз обелискына гирляндалар салу белән тәмамланды.
