Рөстәм Миңнеханов: “Сезгә уңышлар һәм аяз көннәр”
Татарстан Республикасы Президенты Рөстәм Миңнеханов бүген эш визиты белән Тәтеш районында булды.
Рөстәм Нургалиевич "Колос" агрофирмасы" ҖЧҖ кырларында авыл хуҗалыгы предприятиеләре җитәкчеләре, җирлек башлыклары, район службалары җитәкчеләре белән аралашты. Аграрчылар биредә үк үстерелгән продукция үрнәкләрен - бөртек һәм яшелчә культураларын, шикәр чөгендерен күрсәттеләр. Мәгълүматлар стендында районның икътисадый күрсәткечләре белән танышырга мөмкин иде.
Район башлыгы Рәмис Сафиуллов һәм ТР Премьер-минстры урынбасары - ТР авыл хуҗалыгы һәм азык-төлек министры Марат Әхмәтов озатуында Рөстәм Миңнеханов "Нур", "Яңа юл", "Маяк", "Содружество", "Колос" кырлары өстеннән очып әйләнде.
.jpg)
Президентның елмаюлы йөзеннән аның Тәтеш аграрчылары эшеннән канәгать булуы сизелде. Беренче нәүбәттә ул "Эшләр барамы?", "Хәлләр ничек?" дигән сораулар белән "Колос" комбайнчылары янына килеп, һәркемнең кулын кысты. "Бездән дә ниндидер ярдәм бар икән, сезгә әнә нинди матур форма биргәннәр", - дип шаяртты Рөстәм Нургалиевич. "Клаас-Тукано" комбайнчылары Валерий Матвеев һәм Альбер Шәйдуллин, район ярышы шартлары нигезендә, 2000 тонна бөртек суктырган өчен Президент кулыннан премия алдылар. Юбилее уңаеннан бүләк алган Бакырчы авыл җирлеге башлыгы Илдар Шәмсетдинов та аерым игътибарга лаек булды.
Район башлыгы хәбәр иткәнчә, бүгенге көнгә мәйданнарның 45 проценты җыелган, гектардан 45 центнер уңыш белән, 87300 тонна бөртек суктырылган. "Без 100 мең тонна суктыруны максат итеп куйдык, - диде Рәмис Хатыйп улы. - көзге культураларны 18-20 мең гектарда чәчәргә планлаштырдык. Туңга сөрәбез. Тәүлек әйләнәсе эшлибез, кәефләр күтәренке".
"Район бердәм, - дип өстәде Марат Әхмәтов, район өчен яңа рекордка ирешү, 100 мең тонна икмәк җыеп алу, мөмкинлеге бар, - дип ачыклык кертте ул. - Бу төбәктә ул алдынгылардан санала. Соңгы ике елда игенчелек культурасы үсте һәм уңай үзгәрешләр күзәтелә. Район матди базасын да җитди рәвештә ныгыта. Уңышлар һәм аяз көннәр генә телисе кала".
"Мондый уңыш белән республика премиясе өчен дә көрәшергә була, - диде Рөстәм Нургалиевич. Халыкка да булышабыз, шәхси ярдәмче хуҗалыклар өчен 360 миллион сум бүлеп бирдек".
Республика башлыгының районга һәр визиты - аның проблемаларын хәл итүдә булыша. Бу юлы район башлыгы 1нче урта мәктәпне ремонтлауга һәм спорт мәйданчыгы төзелешенә өстәмә средстволар кирәклеген әйтте. Биредә үк Рөстәм Нургалиевич үтенечне канәгатьләндерергә йөкләде. Хәзерге вакытта районда капитал салу күләме 270 миллион сум тәшкил иткән 67 объектта төзелеш һәм ремонт эшләре алып барыла.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84
