Салкын улак яңа “күлмәк киде”, матурланды...

(Тәтеш, 11 июль, "Тәтеш таңнары").  “Авыл урамнарының берсендә урнашкан улакны узган ел төзек­ләндергән идек. Шулай да авылдашыбыз Васыйл абый Яруллин аны үзгәртеп ясарга теләк белдерде, – диде җирлек башлыгы Илнур Юнысов. – Аңа берникадәр үзара салым акчасы да кушып, ул да үзеннән өлеш кертеп, менә шундый үзенчәлекле корылма ясалды. Аны беркөн авылдагы ир-атлар белән җыелып урнаштырып куйдык. 

Хәзер яңа корылмалы улакка су алырга, кер чайкарга килүчеләргә икеләтә сөенечле булыр дип уйлыйм. Әйтергә кирәк, әлеге улакны күп еллар элек ­Васыйл абыйның энесе Наил абый (мәрхүм) ясаткан булган. Хәзер авылдагы Салкын улак Яруллиннарның истәлеген саклауны дәвам итә”.

фото: архив/Авангард