Сөт җитештерүне арттырырга кирәк

Семинар-киңәшмәдә терлекчелек, үсемлекчелек тармаклары эше, дәүләт ярдәме турында мәгълүматлар җиткерелде, кадрлар белән тәэмин ителеш, хезмәткә түләү, авыл хуҗалыгы җитештерүчеләренә дәүләт ярдәме мәсьәләләре каралды, киләчәккә бурычлар куелды.

Анда катнашучылар се­минарның гамәли өле­шендә машина-трактор паркы территориясендә, алдынгы хуҗалыкның терлекчелек биналарында булдылар.
Килдеш мәдәният йорты базасында район башлыгы Рәмис Сафиуллов катнашында җитди сөйлә­шү булды, анда семинар-киңәшмәнең теоретик өлеше узды.
“Авангард” авыл хуҗа­лыгының җитештерү күр­сәткечләре һәм эшләр­нең торышы турында аның җитәкчесе Виктор Абрамов сөйләде.

– Бөртеклеләрнең уңышы гектардан 50 цент­нер тәшкил итә. Бү­ген­ге көндә бер сыердан 24,5 килограмм сөт ­савабыз, сөтнең товарлылыгы 98 процент тәшкил итә. Эшләүчеләрнең гомуми исәбе – 36 кеше. Ел башыннан алып октябрьгә кадәр егерме биш миллион сум хезмәт хакы түләнде, бу узган ел белән чагыштырганда 3,5 миллионга күбрәк. 11 миллион сум салым түләнде. Техниканы яңартырга тырышабыз, быел төягеч, чапкыч, өч трактор арбасы сатып алдык. Ашлык склады төзедек, аңа 800 тоннага якын бодай керәчәк, икенче складта яңартып төзекләндерү бара. Хез­мәтчәннәр өчен йорт сала башладык. Соңгы елларда җиде йорт төзедек, – диде Виктор Ильич.

Район башлыгы ­Рә­мис Сафиуллов башка җи­тәкчеләргә дә кадрлар мәсь­ә­ләсен хәл итүгә “Аван­гард” хуҗалыгы үр­нәгендә ярдәм итәчәк шундый ук төзелеш турында уйланырга киңәш итте. Хезмәт нәтиҗәлелегенә һәм кадрларның тотрык­лылыгына лаеклы хезмәт хакы түләү куәтле этәргеч булып тора. Рәмис Хатыйп улы авыл хуҗалыгы предприятиеләре җи­тәк­челәренә ­уртача хез­мәт хакын 90 мең сум­га җиткерүне таләп итте. Агымдагы елның 1 нояб­ренә район буенча ул 
63 717 сум тәшкил итә, кайбер хуҗалыкларда бу 70 – 80 мең сумга кадәр җитәргә мөмкин, ә башкаларында 50 мең сумнан да кимрәк. 

Районның авыл ху­җалыгы һәм азык-төлек идарәсе начальнигы Рәмис Гарипов үзенең чыгышында РФ Авыл хуҗалыгы министрлыгы тарафыннан 2030 елга кадәр агросәнәгать комплексы алдына продукция җитештерүне, экспортны һәм технологик бәйсезлекне арттыру буенча бурычлар куелуын әйтеп үтте. Терлекчелек тармагында сөт җитештерү – 114 процент, 1 сыердан бер елга сөт савып алу кимендә 10 000 килограмм тәшкил  итәргә, терлекләр һәм кош-кортларны тере авырлыкта җитештерү үсеше 108,7 процентка артырга тиеш.  

– Район буенча тулаем сөт саву узган елга караганда быел 101 процентка артты. Әмма моның белән беррәттән шундый хуҗалыклар да бар, аларда сөт җитештерү күрсәткечләре узган елгы дәрәҗәдән түбән. Мондый вәзгыять шунысы белән аянычлы, финанс елы тәмамлангач алар бер литр сөт өчен алынган субсидияләрне процент нисбәтендә республика бюджетына кире кайтарырга тиеш булалар, – дип кисәтте артта калучыларны Рәмис Әхмәт улы.

Ул хуҗалыкларда сыер­лар­ның продуктлылыгын һәм бер терлектән кергән акчалата табышны анализлап, терлекләрне тулы кыйммәтле ашатуга, моңа туклыклы азыклардан башка ирешү мөмкин булмавына басым ясады.

Сөт терлекләрен үрчетү өлешендә махсус орлыкландыруны куллануга игътибар бүлеп бирелде, бу токымлы бозаулар булдырып, тана бозаулар һәм киләчәктә төп көтүне үрчетү өчен файдаланылачак авыл хуҗалыгы терлекләре исәбен арттыруга ярдәм итә. 

Киңәшмә кысаларында авыл хуҗалыгы җитәкче­ләре файдалана алырлык дәүләт ярдәме чаралары әйтеп үтелде. Аларга авыл хуҗалыгы җитештерүен яңартып төзекләндерүгә чыгымнарның бер өлешен каплау өчен субсидияләр алу мөм­кинлеге турындагы мәгъ­лүмат җиткерелде. 

– Һәрбер сорауга системалы рәвештә якын килергә кирәк. Күпме катлаулы ашлама, аммиак селитрасы, шикәр чөгендере, кукуруз һәм көнбагыш орлыклары кирәклеген исәпләгез, орлык сайлауга игътибарлырак булыгыз, ягулык-майлау материаллары хәстәре турында да кайгыртырга кирәк. Кредит оешмаларына мөрәҗәгать итегез. Шулай да бүгенге көндә безнең өчен иң отышлысы – сөт җитештерү, ул та­бышлылыкның 70 – 80 процентын бирә. Бездә резервлар бар, – дип билгеләп үтте Рәмис Сафиуллов.

Киңәшмә азагында ул авыл хуҗалыгы товар җи­тештерүчеләренә нәти­җәле хезмәтләре, авыл хуҗалыгы ярминкәлә­рен оештырулары, шәх­си ярдәм­че хуҗалыклар алып баручы авыл кешелә­рен ашлык белән тәэмин итүләре, шулай ук махсус хәрби опе­рациядә катнашучыларга зур булышлык күрсә­түләре өчен рәхмәт белдерде.