Тәтешлеләр – Болгар җирендә
25 майда узган "Изге Болгар җыены"нда бездән Тәтеш районы башкарма комитеты җитәкчесе Радик Нургалиев һәм тагын 160лап кеше катнашты.
Сәгать 5тә хакимият бинасы яныннан кузгалып киттек. Һәркемнең кәефе күтәренке. Автобуста өлкәннәр дә, яшьләр дә бар. Администрация, сәфәргә чыгучыларның сәламәтлеген кайгыртып, медицина хезмәткәрләре Лариса Батталова белән Айдар Ибраһимовны билгеләгән. Талгын гына агылган көйгә кемдер йокымсырап, берәүләр үзара сөйләшеп баралар. Берникадәр вакыттан соң татар милли мәдәни үзәге җитәкчесе Асия Ибраһимова Радик Нургалиевның һәм район башлыгы урынбасары Александр Дубровскийның телефон аша исән-сау барып кайтуыбызны белдергән теләкләрен җиткерде.
Без - Шәһри Болгар җирендә. Райондашларымның төрлесе-төрле якка тарала да башлады. Кемдер Ак мәчеткә, кемдер Икмәк музеена, елга вокзалына һәм башка җирләргә юл тотты.
Биредә шулай ук илебезнең төрле кыйтгаларыннан җыелган мөселман кардәшләребез дә бик күп иде. Үзенә күрә бер шәһәрчекне хәтерләтеп палаткалар тезелеп киткән. Ерак җирләрдән килүчеләр һәм теләге булган һәркем биредә Корбан чалып, борынгы бабаларыбыз рухына дога кылдылар. Хәтфәдәй яшел чирәм өстендә, табын җәеп рәхәтләнеп ашап-эчеп ял итеп була.
Бәйрәм Истәлек билгесе янында башланып китте. Аннан соң Болгар цивилизациясе музее белән берләшкән елга вокзалын ачу тантанасы булды. Анда ил башлыклары, татар мөселман форумы эшлеклеләре һәм диния нәзарәте рәисләре барлык мөселман халкына үзләренең җылы теләкләрен җиткерделәр.
Шулай ук, кунаклар өчен Коръән һәм вәгазьләр уку, мөнәҗәтләр көйләү, татар халык җырларыннан концерт, хәләл ашамлыклар һәм күптөрле товарлар, сувенирлар сату оештырылган иде.
Җыен Хан мәчете хәрабәләре мәйданында өйлә намазы уку белән тәмамланды.
Без дә акрын гына кайту юлына чыктык. Изге җирдә булучылар боларның барсын да күреп кайту мөмкинлеге тудырган район башлыгы Валерий Чершинцевка, аны оештырган Асия Ибраһимовага, автобус биргән эшкуар Әсхәт Рафиковка чиксез рәхмәтләрен әйтеп, киләсе елларга да барырга насыйп булсын иде дигән теләкләр белән, җылы гына саубуллашып өйләренә таралыштылар.
Следите за самым важным и интересным в Telegram-каналеТатмедиа
Нет комментариев