Төп проблема – павильоннар һәм расписание
Автобуста пассажирлар ташу хәле район башлыгы Валерий Чершинцевның әлеге бизнесны башкаручы эшмәкәрләр белән сөйләшү темасы булды.
Очрашуда катнашучы дүрт пассажир ташучыдан, күбрәк Юрий Ишелевка җавап бирергә туры килде, чөнки аның предприятиесе шәһәр маршрутларында эшли, менә шуңа тәтешлеләр ярсулы да инде. Пассажирлар маршрутның үз вакытында йөрмәвенә зарланалар. Еш кына озак вакыт автобусны көтеп тә, ул килмәгәч, такси чакыртырга яисә җәяү барырга мәҗбүрләр. Икенче юлы әлеге пассажир автобусны көтеп тормаячак, билгеле. Таксистларга көндәшләренең ашыкмавы кулай гына, ә автобус шоферлары зыян күрә. "Узган ел шәһәр буенча йөреп, ике йөз мең сумлык зыянга эшләдек", - дип зарланды Юрий Ишелев. - Бөтен шәһәрдә дә пассажирлар йөртү табышлы, Тәтештә дә шулай булсын өчен, бары тик пассажирларны хөрмәт итәргә генә кирәк, - диде Валерий Чершинцев. Аларга тукталышта кофе белән ипи түгел, ә автобус көткәндә яңгырдан яки җилдән ышыклану өчен гади павильон гына кирәк.
Һәм уңышның икенче факторы - һәр тукталышта автобус расписаниесенең булуы. Әгәр пассажир җәмәгать транспортын биш кенә минут көтәргә кирәклеген белсә, ул таксига шалтыратмаячак та. Әмма, расписание тайпылышсыз, җиренә җиткереп башкарылырга тиеш. Павильоннар һәм расписаниеләр проблемалары хәл ителерлек, әмма бәла шунда, көндезге һәм кичке рейсларга автобуслар җитешми. Берникадәр бу проблеманы чишүдә шәһәрара рейслардагы автобуслар ярдәм итәчәк.
Әлегә алар "үзләренеке булмаган" пассажирларга игътибар итмиләр. Мәсәлән, автобус Буадан туган шәһәренә кайтып бара, ә Людоговкада кеше кул күтәреп басып тора ди. Ни өчен соң аны үзәккә кадәр илтеп булмый, бу бит бушка эшләнми? Әгәр павильоннарда шәһәрара автобусларның расписаниесе дә эленгән булса, проблеманың кискенлеге сизелеп кимиячәк. Пассажирлар ташучы эре эшмәкәребез Әсхәт Рафиков павильоннар урнаштыру белән иминлек турында да, ягъни, тиешле билгеләр һәм юл тамгалары куярга кирәклеген дә, онытмасыннар иде дигән теләген җиткерде. Тагын бер сизелерлек проблемаларның берсе - халыкны авылларга ташу. Җыеннарда халык район үзәгенә бару өчен такси чакыртырга яки узучы машиналар ярдәмендә барырга кирәк булуы турында зарланды. Берничә авылга автобус җибәрелгән. Һәм нәрсә? Хәзер инде эшмәкәрләр зарлана - Чинчуринога һәм Монастырскийга автобуслар ярым буш яки бөтенләй буш йөриләр.
Валерий Чершинцев, авылларга автобуслар йөрергә тиеш, әмма эшмәкәрләрнең мәнфәгатьләрен дә кайгыртып, авыл җирлеге башлыклары бу мәсьәләне җентекләп өйрәнергә тиешләр дип билгеләп үтте. Халыкның ихтыяҗларын һәм мохтаҗлыгын алардан башка, тагын, кемгә белергә?
