Төзелеш сезоны башланды

Райбашкарма комитеты җитәкчесенең беренче урынбасары Наил Урма­нов районда төзелеш сезонының ничек баш­лануы хакында редакция белән уртаклашты.

- Наил Рөстәмович, быел районда нәрсәләр төзелергә һәм капиталь ремонтланырга тиешле­ген укучыларыбызның ис­лә­ренә төшерсәгез иде?

- Барыннан да элек, күп фатирлы алты йорт­ка ка­питаль ремонт ясала­­чак: Мәктәп урамында 18нче йорт (түбәсе, фа­са­ды, су үткәргече, канализациясе алыш­тырылачак, быел анда ике контурлы ка­заннар куелачак); Камай ура­мында 11, 13нче йорт­лар­ (фасадлар, су үт­кәргечләр, канали­за­цияләр); Тәтеш­кә 200 ел урамындагы 3, 6, 9нчы йортлар (3, 6нчы йортта, җылыту системасыннан тыш, барлык эшләр дә башкарылачак, ә 9нчы йортта - канализация).
Шәһәрдәге 1нче урта мәктәпнең иске бинасын һәм Олы Шәмәк урта мәктәбен капиталь ре­монтлау таләп ителә. Алар­ның түбәләре, тә­рәзәләре, ишек­ләре, алыш­тырылачак һәм баш­ка эшләр. Апрель ахы­рында ипотека буенча 18 фатирлы йорт төзелеше башланачак. Авария хә­лен­дәге өйләрдән кү­черү программасы буенча 50дән артык фатир са­лу планлаштырыла. Удель­ное Нечасовода һәм Алабирдедә мо­дульле фельдшерлык-акушерлык пунктлары төзеләчәк. "Чиста су" программасы буенча Бизяевкада, ко­ры килгән җәйдә дә тәтешлеләр суга тил­мер­мәсен өчен, өч скважина борау­ланачак, Башчыда су үткәргеч сузу эшләре тәмамланачак. Болар төп төзелеш объектлары.

- Подрядчылар кемнәр, алар нәрсәгә нигезләнеп сайлап алындылар?

- Санап үтелгән объект­лар төзелешендә үзләрен яхшы яктан таныткан, эшләрен югары сыйфат белән башкарган под­рядчылардан "Энер­гия Буа" ҖЧҖ (Мәктәп һәм Камай урамнарындагы йортларда, ФАПларда, 1нче мәктәптә), "На­деж­да" ҖЧҖ (Тә­теш­кә­­ 200 ел ура­мындагы йортларда), "Успех-1"­­ ҖЧҖ (Олы Шәмәк мәктәбендә) эш­ләячәк. Икенче мө­һим шарт - башкарылган эш­ләрдән тиешле са­лым безнең районда калачак.

- Төзелеш эшләре нинди объектларда башланды?

- "Энергия Буа" ҖЧҖ Мәктәп һәм Камай урамында­гы йорт­лар­ны ремонт­лауга бе­ренчеләрдән ­бу­лып ке­реште. 1нче мәк­тәп өчен материаллар әзер һәм озакламый эш­кә керешәчәкләр. Ала­бир­дедә ФАП өчен нигез салынды.

- Хаталардан сабак алырга кирәк диләр. Былтыр район төзелеш мәйданнарында шундый хәлләр булды. Быел бар­лык объектларны ва­кытында һәм сыйфатлы итеп башкару өчен нәр­сәләр игътибарга алынды, анализланды һәм нинди чаралар күрелде?

- Узган ел Олы Тормы авыл мәдәният йорты төзелеше соңгарып баш­ланды. Шул сәбәпле аны тапшыру вакыты да озакка сузылды. Заказчы "Главинвестрой" төзелеш бүлеге һәм райбашкарма комитетының торак-ком­му­наль хуҗалыгы һәм энергетикларының көчле контрольлеге нә­тиҗәсендә подряд­чылар эш графигын үтәрләр һәм барлык объектлар да вакытында тапшырылыр дип ышанабыз.
- Быел яңа юллар кайда салыначак?
- Республика төзелеш программасы буенча тө­зекләндерү эш­ләре өчен Тә­тешкә 30 миллион сум бүлеп бирелде. Шуның егермесе юллар төзүгә, шул исәптән каты өслек­ле, китәчәк, чөнки шә­һәрдә вак таш җәелмәгән юллар 30 километрдан артык әле. Ун миллионы таштан тротуарлар салуга то­ты­лачак, асфальтка ка­раганда аермасы зур түгел, әмма матур.
Пристань юлын тө­зек­ләндерү эшләрен башлау планлаш­тырыла, сез инде бу хакта язып чыктыгыз. Кушкуй, Лап­тевка юллары яңа тех­нология буенча (битум катнаш вак таш­тан), үзкыйммәтен киметү өчен, салы­начак. Тархан - Бакырчы - Борындык юлларын ремонтлау дә­вам иттереләчәк.

- Тәтешлеләр, башка район вәкилләре бе­­лән бергә Казанда ста­дион төзелешендә эш­ли­ләр. Рейтингта нин­­­­ди урынны билибез һәм "Типовой спорт мәй­данчыгы" призына дәгъва кыла алабызмы?

- Көн саен таш түшәү, бизәү һәм җыештыру эш­ләренә районнан эш­­че­ләр баралар. 1200 квадрат метр таш җәелде. Рейтинг буенча районнар арасында без 27, 30нчы да булдык, бүгенге көндә - 19нчы урында. Спорт мәйданчыгы алырга дип тырышып эшлибез.

- Сезгә һәм районның барлык төзүчеләренә, бө­­тен проектлар һәм про­граммалар вакы­тында, сыйфатлы итеп баш­ка­рылсын өчен, сезонның уңайлы булуын телибез.