Төп кыйммәтләр мәңгелек

(Тәтеш, 5 ноябрь, Тәтеш таңнары, Мәдинә ИБӘТУЛЛИНА). Түгәрәк дата уңаеннан Казанда булып узган төп тантаналы чарада тә­тешлеләр дә катнашты: Геннадий Митрофанов, Альберт Губашев, Александр Дубровский, Расих Шагаев, Людмила Путятинская, Николай Торгайкин, алар – комсомол хәрәкәте активистлары һәм бүген дә актив тормыш карашын билиләр. Безнең районда юбилейга багышлап төрле чаралар булды. Мәктәпләрдә укучылар комсомол ветераннары белән очраштылар, ВЛКСМ тарихыннан кызык­лы фактлар белделәр, каһарман комсомолчылар турында сөйләделәр. Район китапханәчеләре дә зур эшләр башкардылар: стендлар әзерләделәр, әңгәмәләр уздырдылар, совет чорындагы яшьләр оешмасы эшчәнлеге һәм оешмалары турында лекцияләр укыдылар. Үзәк китапханә хезмәткәрләре тарафыннан үткәрелгән “Комсомол – яшь кенә түгел, комсомол минем язмыш” дип исемләнгән кичә тәтешлеләр күңелендә тирән уелып калды. Авыл мәдәният йортларында да бу көннәрдә җанлылык хөкем сөрде, оештыручылар “Комсомолга – 100 ел” дип берләштерелгән бер темага төрле күләмле чаралар хәзерләделәр. Районның рус милли-мәдәни үзәге җитәкчесе Олег Евсеев шәһәрдәге мәктәп укучылары белән очрашканда районда комсомол үсеше, комсомол дружиналары һәм төзелеш отрядлары турында сөйләде. “Иҗади көч-кодрәт, ватанпәрвәрлек хисе, нык гражданлык карашы, хезмәт ялкыны – комсомол ветераннарын һәм хәзерге яшьләрне әлеге барлык сыйфатлар бәйли”, – дип саный шәһәрдәге 1нче мәктәпнең, хәрби училищеның, армия хезмәте узган хәрби частьнең элекке комсомол комитеты сек­ретаре Олег Николаевич.

Музей хезмәткәрләре комсомол белән бәйле сирәк очрый торган әйберләрне җыйдылар һәм тирән мәгънәгә ия күргәзмә әзерләделәр.

Райондагы бәйрәм чаралары Тәтеш авыл хуҗалыгы техникумын­да комсомол ветераннарының очрашуы – матур кичә белән тә­мамланды. “Еллар узу белән үз эшебезне яңадан күздән кичереп, комсомол безне эш сөючән, куелган максатларга ирешүдә тырыш итеп, бердәмлек хисендә тәрбияләвен ышаныч белән әйтә алабыз”, – дип уртак­лаштылар комсомол ветераннары.

“Башта  Ватан турында уйла, ә аннары үзең хакында” дигән сүзләр әлегә кадәр ветераннарның тормыш шигаре булып тора.