Тәтеш районы Сөендек авылында гражданнар җыелышы булды

Мәктәпнең чара үтә торган зур булмаган коридоры туган якларының бүгенге­се һәм киләчәге белән кызык­сынган башчылылар, сөендек­леләр белән тулы иде.

"Узыгыз, утырыгыз, менә Башчыда яңа мәдәният йорты төзелгәч, ул чакта урын һәркемгә дә җитәрлек булачак", - дип кунакчыл чакыралар районнан килгән вәкилләрне авыл кешеләре. Җирлек баш­лыгы Хафиз Измайлов та моны раслады: "Җәйне көтеп тормыйча, төзүчеләр бу айда ук инде эшкә кере­шә­чәкләр".

Аның үткән елга отчеты барышында, анда шактый гына уңай ми­з­гелләр яңгырады, халыкны борчыган мәсьәләләр дә каралды.

Ул йорт ху­җалыкларында никадәр техника барлыгын әйткәннән соң, район баш­лыгы урынбасары Евгений Курков болай дип билгеләп үтте: "Барыбызга да күренгәнчә, халык начар яшәми, узган елда кредитлар бары тик 1 миллион 260 мең сумлык кына алынган. Авыл кешеләре өчен программа эшләгәндә алардан файда­ланырга кирәк, чөнки Хөкүмәт акча­ны нәкъ сезнең өчен бү­леп бирә дә бит инде".

Халыкны авылларда Сбербанк бүлеге булмавы бор­чый. "Карт кеше акча алыр өчен Тәтешкә бара аламы инде, аңа шулай ук карточка белән эшләве дә кыен", - дигән тавыш яңгырады залдан. Евгений Гаврилович моңа бик тиз җавап бирде: "Шушы айдан райондагы һәрбер җирлек территория­сендә сезгә уңайлы булсын өчен нотариаль эшләр яңадан башлап җибәрелә. Документларны урында рәс­ми­ләштерегез".

Балаларны йөртә торган салкын автобусны җылыга алыштыру мәсьәләсе дә хәл ителәчәк. Шулай ук юлларны, су үткәргечне ремонтлау, тулаем террито­рияләрне төзекләндерү ту­рында да сөйләшү булды.

Халык авылдагы кыр-ба­суларның буш ятмавын уңыш елмаюга тиң дип са­ный - игеннәр гөрләп үсә, көзен шикәр чөгендере өемнәре барлыкка килә, хатын-кызлар фермага савымга ашыга. "Р. Г. Сафиуллова" КФХ биредә инде ун ел нәтиҗәле эшли, анда 38 кеше хезмәт куя, сезонга карап өстәмә кадрлар җәлеп ителә. Өстәвенә эшчәннәрнең айлык хез­мәт хакы уртача 28 мең сум тәшкил итә.

Район башлыгы урынбасары уннарча ел элек фермада бер сыердан савылган сөт 1 килограмм җиде йөз грамм тәшкил итүен, бүгенгә - 17 килограмм, ә үткән ел бер башка уртача сөт савымы 6900 килограмм булуын искә төшереп үтте.

Авыл хуҗалыгы предприя­тиесенең башкарма директоры Илсур Мөхәммәт­җанов 2016 елда җитештерелгән продукцияне сатудан алынган акчалата керем 202 миллион сум тәшкил итә, продукция­нең артымы - 33 процент, дигән мәгълүматны җиткерде. Ә хуҗалык вакытында түләп барган барлык салымнар район, республика казнасына керә бит.

Җитәкче Римма Сафиулло­ва авыл халкына һәрвакыт ярдәм итә. Аның булышлыгында авыллардагы юллар даими чистарты­ла, җәй ва­кытларында үләннәр чабыла, төрле чараларда хәйрия ярдәме күрсәтелә.

"Безнең ниятләр һәм проб­лемаларны аңлап кабул иткәнегезгә сөенәбез, - диде җирлек башлыгы Ха­физ Измайлов. - Ләкин сез дә КФХ тәэмин иткән суны файдаланганлыкка түләргә онытмагыз", - дип мөрәҗәгать итте ул якташ­ларына.

Сөендек клубы директоры Люция Хәлиулловага һәм әйдәп баручы кит­апханәче Гүзәл Шәйхиевага район башлыгы Рәхмәтләре, шулай ук авыл хуҗалыгы предприя­тиесе алдынгыларына Рәхмәтләр һәм кыйммәтле бүләкләр тапшыру иң күңелле мизгелләр булды.