Тәтеш үзәк район  хастаханәсенең табиб –   анестезиолог-реаниматологы 43 ел медицинада

(Тәтеш, 20 июнь, "Тәтеш таннары", Елена Викторова, фото автора).
Татьяна Борисовнаның пациентлар гомере һәм сәламәтлеге өчен көрәшүнең күпме йокысыз төннәрен һәм бетмәс-төкәнмәс сәгатьләрен исәпләп бетерә алмаслык мөгаен, чөнки 43 ел эчендә медицинада ул йөзләгән кеше гомерен саклап калган!

Кайчагында үз-үзенә ышанычлы, белемле һәм үҗәт кеше үзенең бер карашы белән авыручыларны гына түгел, аларның туганнарын да операциянең уңышлы тәмамлануына ышандыра.
Тәтештә туып-үскән кыз, балачактан ук табиб булачагын белә: курчак­ларга операция ясый. Шуңа күрә мәктәпне тәмамлаганнан соң медицина институтына укырга керә, аны тәмамлый һәм 1978 елда Тәтешкә кайта.
– Башта стационарда да, поликлиникада да, бала тудыру йортында да табиб-педиатр булып эшләдем, – ди ­Татьяна Борисовна.
Мондый эш ритмы аны, ул вакытта яшь белгечне бер дә куркытмаган. Хәер, кырык елдан соң да ул шул ук принцип буенча яши: “Минем тормышым – ул эш”, – ди.
Табиблар Розалина Закир кызы Солтанова һәм Александра Дмитриевна Черкашинаны үз остазлары дип саный – беренче елларда аның хезмәт эшчәнлеге нәкъ менә алар белән бәйле. Татьяна Борисовна билгеләп үткәнчә, ул алар ярдәмендә педиатр булып китә алган. Ә хирурглар Валериан Николаевич Кондаков һәм Иван Иванович Сучков инициативасы белән “анестезиолог-реаниматолог” белгечлеге буенча өстәмә ­белем алган.
– Укырга кирәкме-юкмы икән­ле­гендә шик юк иде. Миңа тәкъдим иттеләр – мин киттем, – ди Татьяна Борисовна.

Ул анестезиолог-реаниматолог вазифасында эшләгән беренче көннәре турында да искә ала.
– Арка буйлап салкын йөгерде, аны мин әле дә хәтерлим. Ул бүген дә йөри, әмма аны күрмәскә тырышам, мондый мизгелләрдә хис-тойгыларга урын калдырмыйм, бары тик эшеңне дөрес итеп башкарырга кирәк. Чөнки һәр очрак – төрлечә. Барысы да инструкция буенча, дәреслек яки китап буенча бармый: барлык пациентларның организмнары төрле, яше дә төрле. Бездә көтелмәгән хәлләр тәүлекнең теләсә кайсы вакытында булырга мөмкин. Кибеттән сумкалар белән кайтасың, ә сине эшкә чакыртып алалар, һәм бу сумкалар белән өйгә икенче көнне генә кайтасың, – дип сөйли Татьяна Борисовна.

Тәтеш районының барлык халкын да туганнан бирле диярлек беләм, ди. Башкача була да алмый: педиатр булып  ун ел эшли, 1988 елдан бирле табиб – анестезиолог-реаниматолог булып, 23 ел дәвамында параллель рәвештә бала тудыру йортында неонатолог ­булып та эшли.

Татарстанның мактаулы сәламәтлек сак­лау хезмәткәре, ТР сәламәтлек сак­лау отличнигы Татьяна Шиһабетдинова сайлаган һөнәре турында беркайчан да үкенмәгән, чөнки ул үзен башка һөнәрдә күз алдына да китерә алмый, “Финансист яки юрист миннән килеп чыкмас иде”, – ди.

Һәр медицина хезмәткәре өчен иң яхшы бәя – пациентлардан рәхмәт сүзләре ишетү. Татьяна Борисовна да аларны көн саен диярлек ишетә. Ә тагын, анестезиолог-реаниматолог өчен кеше операциядән соң күзләрен ачып аңына килгән мизгелдән дә кыйммәтрәк нәрсә юк.