Тәтешле Владимир Ненашев районны газлаштыруда актив катнашучыларның берсе
Ул газ трассасын Олы Тормыдан Келәшкә сузу өчен Ульян өлкәсеннән командировкага килә. Тәтештә үзенең язмышын очрата һәм биредә төпләнеп кала.
"Егерме ел элек, - дип искә ала Владимир Васильевич, - эшләү өчен бернинди механик җайланмалар юк иде, торбаларны да үзебез күтәреп куйдык, аергычларны да бөктек, баганалар утырту өчен измәне дә үзебез ясадык".
Хәзер газ һәркем өчен күнегелгән нәрсә: казанны кабызасың да, санаулы минутлар эчендә торбалар җылына, краннан кайнар су ага, элек бит шушы уңайлыкларга ризалык бирсеннәр өчен халыкны үгетләргә кирәк булды. "Кинәт газ булмаса, нишләргә? Ярар, тик мичне, алай-болай булса дип, калдырабыз", - хәзер мондый җавап елмаю тудыра.
"Шуннан соң, ул йортларга килгәч, рәхмәт сүзләрен күп ишетергә туры килде", - ди тәҗрибәле газчы.
Аварияләрне бетерү бригадасы, ул анда слесарь булып эшли, диспетчер чакыруы буенча биш минут эчендә чыгып китәргә әзер. Торакның сакланышы гына түгел, кайчакта кеше гомере дә өлгерлеккә һәм һөнәри осталыкка бәйле була.
Газ чыгып тору халыкны борчыган сәбәпләрнең берсе. Газчылар киләләр, ә хуҗаның морҗа капкачы ябылмаган, я булмаса тоташтыргыч торба каткан. Төтен юллыкларын карарга, вентиляция каналларын тикшереп торырга кирәк. "Элек сменага 20шәр чакыру була иде, ә хәзер 3-5, газ җайланмалары да ышанычлырак була башлады, заманча экономияле казаннар да көнкүрештә әллә ни проблемалар тудырмый", - дип фикерләре белән уртаклаша Владимир Васильевич.
Белемнәрен, һөнәри осталыкларын күтәрү өчен газчылар тиешле курслар үтәләр, менә безнең героебыз да үзенең белгечлеге буенча бишенче разрядка ия. "Намуслы, җаваплы, гадел", - ди аның хакында предприятие җитәкчесе Сергей Кузнецов.
Үзе белән бригадта берничә еллардан бирле эшләүче Михаил Панов һәм Николай Шимуриннар да аны ярдәмчел, киң күңелле, ышанычлы булганы өчен хөрмәтлиләр. "Кирәкле урында һәрвакыт киңәшен бирә, ярдәм итә", - диләр алар.
Сменадан кайтканын өендә сөекле хатыны көтеп торуын Владимир Васильевич яхшы белә, аларның уртага салып сөйләшерлек сүзләре җитәрлек. Бергәләп урманга йөрүләр, чишмәгә суга барулар җылы аралашу минутлары бүләк итү белән бергә, табигатьтән яшәргә көч алырга да мөмкинлек бирә. Өендә балалары һәм оныгы белән бергәләп маринадлаган гөмбәләрдән авыз итү, җиләк кайнатмасы белән тәмләп чәй эчүләр үзе генә дә ни тора!
Гаилә - аның өчен тормышта иң мөһиме, һәм якыннары бәхете хакына ул кулыннан килгәннең барысын да эшли, ә алар моңа каршы үзләренең ихлас яратуларын һәм рәхмәтләрен бүләк итәләр.
Иң мөһим һәм кызыклы язмаларны Татмедиа Telegram-каналында укыгыз
