Тәтештәге 1нче урта мәктәптә “Кечкенә ил” көндезге мәктәп яны җәйге лагереның икенче сменасын ябу тантанасы булды
"21 көн эчендә дөнья буйлап сәяхәт" исеме астындагы сменада балалар уеннар рәвешендәге чараларда төрле илләр белән таныштылар, күзаллау рәвешендә милли бәйрәмнәрдә булдылар, гореф-гадәтләрне искә алдылар һәм йолаларда катнашып, үзләренең белем дәрәҗәләрен үстерделәр.
Мәсәлән, балалар Бөекбританиядә булып, "Гиннесс рекордлар" китабы турында белделәр. Алар Гиннесс-шоу уздырдылар һәм смена сәяхәтчеләре рекорды китабын төзеделәр.
Смена барышында укучылар белән балалар китапханәсе хезмәткәрләре эшләделәр, һәм "Барсы да урман турында" дигән викторина уздырдылар. Балалар янына кунакка килгән ЮХИДИ хезмәткәрләре шәһәр урамнарында һәм юлларында үзеңне ничек тотарга кирәклеге хакындагы профилактик әңгәмә үткәрделәр. Лагерьда "Юл әлифбасын яхшы белүче" дип исемләнгән викторина да булды. Экология темасына да игътибар бирелде: "Без сәламәт тормыш рәвеше яклы" рәсем конкурсы оештырылды, лагерь территориясендәге чүп-чарны җыештыру буенча "Коткаручылар, алга!" операциясе уздырылды.
Мәликә Сөләйманова:
"Мәдәникүңел ачу үзәгенә поход һәм "Реальная белка" 3D киносын карау, Болгарга сәяхәткә бару минем өчен аеруча да истә калырлык булды. "Канада һиндлары хәзинәсен эзләү" гомумлагерь уенында рәхәтләнеп катнаштым".
Ксения Борисова:
"Лагерьда бик ошады. Без материклар һәм континентлар буйлап сәяхәт кылдык. "Олимпия кече уеннары", "Джунгли чакыруы" дигән төрле спорт ярышларында катнаштым. Мине күп нәрсәләргә өйрәткән тәрбияче апаларыма, безне кайгырткан, буебызны, авырлыгыбызны үлчәгән шәфкать туташы Алла Николаевнага рәхмәтлемен. Смена барышында мин 1 сантиметрга үстем".
Руфинә Усманова:
"Монда үтелгән көннәр заяга узмады. Барлык конкурсларда да бик теләп катнаштым. Тәрбиячеләргә һәм аш пешерүчеләргә хөрмәтем зур".
Ял вакытында балалар белән өлкән тәрбияче Наталья Трофимова, тагын сигез тәрбияче һәм шәфкать туташы эшләделәр. Икенче сменада "НЛО", "Торнадо", "Әфлисун" һәм "Адреналин" командаларында җиде яшьтән алып унөч яшькә кадәрге 80 укучы ял итте.
Лагерь начальнигы Наталья Канаева эшкә йомгак ясады. Балаларның күбесе "Иң иҗадилар", "Иң спорт яратучылар", "Иң эрудициялеләр" дигән төрле номинацияләрдә катнашып, грамоталар һәм истәлекле бүләкләр алдылар.
Рәсми чыганаклардан:
Безнең районда җәйге каникул вакытларында 12 мәктәп яны лагере эшләде, Тәтештәге 1нче һәм 2нче мәктәпләрдә - ике сменада. Анда барлыгы 600 укучы ял итте, дип хәбәр итте райбашкарма комитетның мәгариф бүлеге начальнигы урынбасары Инна Лазарева.
