Тәтештәге “Миләшкәй” балалар бакчасында җылы булачак

Бүген "Миләшкәй" балалар бакчасы зур төзелеш мәйданчыгын хәтерләтә: биредә җиде бригада хезмәт куя һәм җитәкчеләре белән берлектә бакча коллективы да эшчеләр белән бер сафта.

Балалар бакчасы мәктәпкәчә учреж­дениеләрне капи­таль ремонтлау программасына очраклы гына кертелмәде - ул шәһәрдәге иске биналарның берсе санала. Бу максатларга 16 миллион сумнан артык бүлеп бирелде", - дип хәбәр итте райбашкарма комитеты җитәкчесе урынбасары Әхәт Фатыйхов.

Мөдир Татьяна Лубганс сүзләренчә, бинага күптән ремонт таләп ителгән. Ике ел элек плас­тик тәрәзәләр, тышкы ишекләр куелган булган, әмма проблемалар кала биргән. "Гыйнварда безнең балалар бакчасына 35 ел тула. Аны капиталь ремонтлау турындагы карар - юбилеебызга иң яхшы бүләк. Респуб­лика һәм район хакимия­тенең беренчеләрдән булып безнең шартларны яхшырту мөмкинлеген бирүләре сөенечле", - дип сөйләде Татьяна Николаевна.

Әлбәттә, биредә тәрбия­ләнүче 134 сабыйны ремонт вакытында кая да булса урнаштыру мәсьәләсе дә килеп туа. Шәһәрнең һәм район авылларының башка мәктәпкәчә учреждение­ләре ярдәмгә килеп, 65 бала­ны үзләренә кабул итәләр. Ата-аналар да, бәхеткә каршы, вакытлы­ча уңайсызлыкларны аң­лаганнар. "Миләшкәй"не яратабыз, кызыбыз бакчага теләп йөри. Ремонт вакытында аны "Әкият"кә күчерергә туры килде. Бина яңа диярлек булачак, шуңа да мондый чараларга карашым уңай", - дип фикерләре белән уртак­лашты Елена Бердникова.

"Ремонт эшләре белән 48 кеше шөгыльләнә. Түбә яңартыла, бина фасады ныгытыла һәм тышлана, җылыту, су үткәрү, канализация сис­темалары тулысынча алыштырылачак. Бина­ның эчен баштанаяк бизәү, янгын сигнализацияләрен алыштыруга кадәр, планлаштырылган. Эшләрнең кайчан тәмамланачагы хакында кистереп әйтергә әле иртәрәк", - диде төзелеш эшләре мастеры Эдуард Харьков.

Шуны да билгеләп үтәсе килә, быел "Әкият" балалар бакчасына плас­тик тәрәзәләр кую планлаштырылган. Бу эш белән "Энергия-БУА" ҖЧҖ шөгыльләнәчәк.

"Бар яхшыны - балаларга". Совет заманындагы шигарь бүген дә көнүзәк. Башкарасы эшләр бик күп, әмма нинди бүләк көтәчәге билгеле булганда, бернинди авырлыклар да куркытмый. Ә бүләк - сабыйларның бәхетле елмаюы.