Туган җирендә төпләнеп калган

Тумышы белән ул Чинчурино егете. Урта мәктәпне тәмамлагач, Монастырскийдагы СПТУда киң профильле механизатор белгечлеге, шуннан соң автомәктәптә укып шофер танык­лыгы ала. Сиксәненче елларда яшьләрне авылда калдыруга зур игътибар бирелә. Евгенийга бәхет елмая - яңа ГАЗ-53 автомашинасын ышанып тапшыралар. Егерме дүрт ел шофер булып эшли - башта колхозда, ул бетерелгәч - Тәтеш район электр элемтәсе узелында.

"Стелз-Агро-Т" агрофирмасы оешкач, туган җиренә кайтырга карар кыла. Шул чакта аңа һәм авылдашы Сергей Филатовка чит илдә эшләнгән "Джон-Дир" тракторын ышанып тапшыралар. Мондый заманча, кыйммәтле техникада эшләү тәҗрибәләре булмаса да, ике дус, бөтен кешене гаҗәпкә калдырып, тиз арада катлаулы техника серләрен үзләштерәләр. Һәм менә ун елдан бирле алар икәү язгы һәм көзге чәчүдә, туң­га сөрүдә хуҗалыкта һәм районда иң югары күрсәткечләргә ирешәләр. Яшь механизаторлар мондый техникада эшләргә кайда укыдыгыз дип кызыксынганда, Евгений: "Буразнада", - дип җавап бирә. Хәтта сервис­та эшләүче күпне күргән белгечләр дә аларның шул еллардан бирле техниканы төзек хәлдә саклап тота белүләренә гаҗәпләнәләр. Ватыла-нитә калса да үзләре төзәтәләр. Хәзер сервистагылар да еш кына әлеге дус экипаж белән киңәш-табыш итәләр.

Трактордан кала Евгений карамагында тагын "Нью Холланд" комбайны да бар әле, ул былтыргы уракта аның ярдәмендә 2600 тонна ашлык суктырган - тимер юл вагоннар составы шулкадәр сыйдыра.

Бүгенге көндә Евгений кулдашы белән тәүлек әйләнәсе көзге культуралар өчен туфрак әзерли. Дуслар ашыгалар: чөнки комбайннарны урып-җыюга төзәтү өчен дә вакыт калдырырга кирәк.