Ут безнең битарафлыкка түзеп тормый

(Тәтеш, 25 гыйнвар, “Тәтеш таңнары”). ТР буенча МЧС ДИнең Кама Тамагы һәм Тәтеш районнары буенча күзәтчелек эшчәнлеге һәм профилактик эшләрнең районара күзәтчелек эшчәнлеге бүлеге кисәтә: спиртлы эчемлекләр кулланмагыз, урын-җирдә, йорт һәм фатир эчендә беркайчан да тәмәке тартмагыз, аеруча да исерек хәлдә булганда; балаларны күзәтүсез калдырмагыз, аларга янгын куркынычсызлыгының гади кагыйдәләрен һәм ут-күз чыкканда үзләрен ничек тотарга, сабыйларны яна торган бинада качып утырырга түгел, ә чыгып китәргә кирәклегенә өйрәтегез; төзек булмаган һәм үз белдеклегең белән ясалган электр чыбыкларын, электр приборларын беркайчан да кулланмагыз, электр челтәренә кирәгеннән артык көчәнеш булдырмагыз, электр җы­лыткычларын файдаланганда саклык чаралары күрегез; көнкүрештәге электр приборларын, газ җайланмаларын кабызылган килеш, шулай ук яна торган мичне күзәтүсез калдырмагыз; фатирлар һәм йортларны газ плитәләре ярдәмендә җылытмагыз. 

“Янгын үзеннән-үзе килеп чыкмый, аның сәбәбе – кешеләрнең ваемсызлыгында һәм ут белән эш иткәндә битараф булуда, – дип белдерә районара бүлек начальнигы эчке хезмәтләр подполковнигы Илсур Камбиев. – Кеше исерек хәлдә булганда үзен тиешенчә тоту халәтен югалта һәм үзенең нишләгәнлеген белештерми, һәм өстәвенә башка кешенең гомере өчен бернинди җаваплылык та ­тоймый”.