Тэтэш таннары
  • Рус Тат
  • Өлгергәнлек һәм осталык чоры

    Иртәгә педагогия көллияте физик тәрбия бүлеге ачылуның 45 еллыгын билгеләп үтә.

    Педагогия училищесы студентлары яулаган югары бүләк - социалис­тик ярышта югары күрсәткечләргә ирешкәннәре өчен Бөтенроссия "Спартак" ирекле спорт җәмгыяте дипломы - уку йортының язмышын билгели.

    1966 елда ТАССР Мәгариф министрлыгы физик тәрбия факультеты ачу мәсьәләсен хәл итә. Ике спорт залы, бер дигән чаңгы базасы, 333 метрлы йөгерү юлы белән стадион, гимнастика шәһәрчеге төзелә.

    Физкультура бүлеген ачуда, аның аякка басып китүендә, ныгуында һәм киң колач алуында үз эшләренең чын осталары - танылган педагог­лар зур өлеш кертәләр. Болар - Вячеслав Тимирясов, Петр Новиков, Николай Селюков, Геннадий Солдаткин, Владимир Бичуков, Леонид Школьников, Александр Исаев, Надежда Гришина, Татьяна Петрова, Наталья Шлячкова. Алар барсы да югары мәдәниятле, таләпчән һәм гадел затлар.

    Бүлек үсә һәм көч туп­лый, җитәкчеләр, бүлек мөдирләре, укытучылар алышына, әмма аңа нигез салучыларның традицияләре һәм матур ниятләре үзгәрешсез кала. Әлеге бүлектә инде күп еллардан бирле тәҗрибәле, югары квалификацияле педагоглар - Валерий Кулаженков, Мария Матвеева, Рәшит Габдрахманов, Алексей Кудяев, Виталий Селюков, Виктория Кушагина, Таһир Мөбәрәкшиннар эшлиләр. Алар үз хезмәтләрен күңел биреп, югары җаваплылык белән башкаралар, тәҗрибәләрен һәм белемнәрен студентлар белән генә түгел, ә район һәм республиканың физкультура укытучылары белән дә уртаклашалар.

    Безнең училищены тәмамлаучылар Россиянең төрле почмакларында эшлиләр, җаваплы постлар билиләр, эчке эшләр министрлыгы органнарында хезмәт итәләр, югары, урта махсус уку йортларында, мәктәп­ләрдә укыталар. Шул еллар эчендә физик тәрбия буенча мең ярымнан артык белгеч әзерләнгән, шулар арасында халыкара класслы ике спорт мастеры, егермедән артык спорт мастеры, спорт мастерлыгына берничә дистә кандидат һәм йөзләгән спортчы-разрядчы бар. Училищены төрле елларда тәмамлаган бик күпләрне олы хөрмәт һәм ихтирам белән әйтеп үтәргә мөмкин: Александр Вотетин, Сергей Тихонов, Нина Воробьева, Юрий Шегуров, Михаил Горохов, Марина Королева, Евгений Нестеров, Сергей Мамкин, Данис Идрисов, Ранис Идрисов, Сергей Павлов, Александр Вавилов, Александр Фурасьев, Виктор Мамкин, Артем Николаев һәм башка бик күпләр.

    45 - бу өлгергәнлекне һәм осталыкны дәлилләүче җитди яшь. Әмма шул ук вакытта яңа эзләнүләр, иҗади карашлар чоры да.

    Физик тәрбия укытучыларына ихтыяҗ һәрвакыт югары булды. Бүлек, үзенең традиция­ләрен саклый барып, алга таба үсүен дәвам итә.

    Нравится
    Поделиться:
    Реклама
    Комментарии (0)
    Осталось символов: