Россия унлыгында

Яна өчен 2006 елның 1 сентябрендә беренче кың­гырау мәктәпкә генә тү­гел, шулай ук балалар-яшүсмерләр спорт мәктәбе тренеры Рәшит Габдрахманов яны­на җиңел атлетика буенча беренче дәрес­кә чакырып­ та чыңлый. Ул спортны берничек тә читләтеп үтә алмый: әнисе Татьяна да җиңел атлетиканы ярата, ә әтисе Валерий футбол һәм хоккейга мөкиббән. Янага иң баштан ук кыс­ка ераклыкка йөгерү уңыш белән бирелә: ул берничә тапкыр респуб­лика Беренчелеге призеры, җиңел атлетика буенча “Яшь шип­лар” күп төрле көрәшнең Россия финалында ике тапкыр җиңүче була. Һәм менә ярыш­ларның берсендә Рәшит Рәхим улы янына хезмәттәше килә дә сокланып болай ди: “Ә синдә шөгыльләнүче кыз талантлы! Тикшереп кара аны, ядрәне ничек ыргыта икән”. Тренер кайтуга ук шәкертләре арасында ядрә ыргыту буенча ярыш оештыра. Яна  кызларны да, малайларны да җиңеп чыга. Әлеге спорт төре буенча өйрәнүләр башлана.  Ядрәнең авыр­лыгы – 4 килограмм. Кыз өчен бу шактый авыр, шуңа күрә ял һәм бәйрәм көннәрендә тырышып шөгыльләнергә туры ки­лә. Ә Россия Беренчелеге алдыннан техника куелышында ярдәмне җиңел атлетика ветераны Вячеслав Тимирясов күр­сәткән, бу шулай ук­ зур­ роль уйнаган. “Бик дулкынландым. Үземнең һәм тренерымның өметен акларга кирәк иде. Рәшит Рәхимович максат куйды – югарыга ирешергә”, – дип уртаклаша Яна. Бер ел күнегүләрдән соң ул Красильников истәлегенә Бөтенросс­ия турнирында призер исемен яулый һәм әлегә кадәр аның 4 тапкыр җиңүчесе булып тора. “Уңыш­лар бар! Сөңге һәм диск ыргытуны берь­юлы үзләштерәм”, – дип өсти ул. Кызлар һәм малайлар шулай ук әлеге спорт төренә тартылалар, ә ул аларны рәхәтләнеп шефлыкка ала. Янаның тормышы тулысынча спорт белән бәйләнгән, өстәвенә волейбол белән бас­кетболны да ярата һәм үзе бухгалтерлыкка укыган авыл хуҗалыгы техникумыннан ярыш­ларда чыгыш ясый. Карандаш белән аклы-каралы рәсемнәр ясарга омтылуын да яшерми. Хәзер аның иң зур казанышы – яшүсмерләр арасында Россия Беренчелегендә алган бронза. Яна илнең иң яхшы нәтиҗәләргә ирешүче кызлар һәм хатын-кызлар унлыгына керә! “Үз көчемә ышаныч барлыкка килде, булдыра алганча тырышам. Идел буе физик культура академиясенә укырга керәсем һәм алга таба да күнегүләр белән шөгыльләнүне дәвам итәсем килә...”