Вшиха тавы һәм Идел баскычы

Тасвирлама:
Шәһәрнең төп күзәтү мәйданчыгы булган Вшиха тавын төзекләндерү проекты «Тарихка 320 баскыч» дип атала: ул шәһәрнең туристик потенциалын ача һәм Тәтешне өйрәнү өчен кызыклы сценарийлар тудыра.
Адресы:
422370, ТР, Тәтеш ш., Табиб Соколовлар урамы

Тәтеш - бай тарихлы, өяз шәһәре күренешен һәм мохитен яхшы саклаган борынгы торак пункт. Шуңа да Тәтешне шәһәрлеләр генә түгел, читтән килүчеләр дә ярата, гәрчә шәһәрдә туристлык инфраструктуралары җитеп бетмәсә дә. Кече шәһәрләрдә һәм тарихи җирлекләрдә уңайлы мохит булдыру буенча Бөтенроссия конкурсында җиңгән проект кысаларында чал Идел ярында елга пристаненнан тауга илтүче яңа баскыч ясалды. Аның озынлыгы 400 метрдан артык, ягъни 320 баскычны тәшкил итә. Юл уңаенда мәйданчыклар – ял итү зоналары эшләнде, анда җирле матурлыкка сокланып утырырга мөмкин. Баскыч кырыйлары көзге рәвешендәге панельләрдән ясалганлыктан, кояшлы көндә корылма җәй һәм кыш айларында әкияти табигать күренешен чагылдырып, балкып тора. Караңгы вакытта баскычта якты утлар сирпи. Фотога төшү өчен гаҗәеп матур урын булуга һәм аннан Иделнең, тирә-якның гүзәллеге күренеп торуга карамастан, яңа баскыч - беренче чиратта инфраструктура һәм мәдәни мирас объектлары арасын бәйләп торучы җеп. Аста – пристань, анда туристик пароходлар йөзеп килә, өстә – күзәтү мәйданчыгы, ә арырак – шул ук Троицк чиркәве һәм зур булмаган борынгы йортлары булган шул исемдәге тарихи урам: алар да акрынлап үзгәртеп төзекләндерелә һәм яңартыла.