Алдакчы белән Казанга юл тотканнар

Россия Эчке эшләр министрлыгының Тәтеш районы бүлегенә 2025 елның март башыннан 9 апреленә кадәр алдакчылык юлы белән (инвестицияләү рәвешендә) аның акчаларын үзләштергән билгесез затларны җаваплылыкка тарту турындагы гариза белән хатын-кыз мөрәҗәгать иткән.

– Сораштыру барышында ачык­ланганча, март башында алар ире белән Интернет челтәрендә “Газпром инвес­ти­цияләр” компаниясе (чынлыкта андый оешма юк!) арадашлыгында үзеңнең акчаларың­ны арттыру мөмкинле­ге турындагы белдерүне күргәннәр. Мөрәҗәгать итүче электрон мессенджер ярдәмендә югарыда әйтеп үтелгән “компания” вәкиле белән элемтәгә кергән һәм күр­сәтелгән счетка 8 000 сум күләмендә беренчел взнос күчергән. Берникадәр вакыттан соң, нинди дә булса керем алмагачтын, зыян күрүче үз акчасын кире кайтарырга булган һәм алдакчылар белән кабат элемтәгә кергән. Әмма аңа табыш алу өчен күбрәк сумма кертергә һәм  берничә финанс операциясе үткәрергә кирәк, дип аңлатканнар. Моны эшләр өчен ир белән хатын янына алдакчыларның бер вәкиле килгән. Аның белән бергә хатын-кыз, шулай ук ире һәм улы Казанга юл тотканнар, анда банк кушымтасы аша берничә түләү ясау һәм банкоматлар аркылы акча алу һәм җинаятьчеләрнең счетларына күчерү юлы белән әлеге “инвесторлар” 2 262 800 сум акчаларын­нан колак какканнар, – дип хәбәр итә полиция хезмәткәрләре.
Югарыда тасвирлан­ган вакыйгалардан соң җи­наятьчеләр зыян күрү­челәрнең шалтыратуларына җавап бирми башлаганнар. Табышны кө­теп арыган һәм үз акчасын югалткан хатын-кыз бер айдан артык вакыт узгач кына ярдәм сорап полициягә мөрәҗәгать иткән. Җинаять эше кузгатылган. Оператив-эзләү чаралары нәтиҗәсендә зыян күрүченең өенә килгән һәм акча күчерергә яр­дәм иткән җинаятьчеләр­нең берсе ­ачыкланган.

Хөрмәтле Тәтеш районы халкы!

Сезне тагын бер тапкыр уйламыйча эш итү­дән – акчаларыгызны бил­гесез счетларга күче­рү­дән һәм акчаларыгызны җи­наятьчеләр кулына тапшырудан кисәтәбез!
Исегездә тотыгыз! Ал­дакчы­ларның күпчелеге россия­­ле­ләрне Украина Кораллы көч­ләренә ярдәм итү максатыннан алдыйлар. Сез җина­ятьчеләргә тапшырган акчалар еш кына Украина солдатларына ярдәм итүгә китә!

фото ИИ белән ясалган