“Авангард” газетасы хезмәткәрләре журналистлар Сабан туеннан бүләкләр һәм призлар белән кайттылар

(Тәтеш, 20 июль, “Тәтеш таңнары”). “Авангард” газетасы хезмәткәрләре Татарстанда беренче тапкыр уздырылган журналистлар Сабан туеннан бүләкләр һәм призлар белән кайттылар.

 “Татмедиа”ның 15 еллыгына багышланган бәйрәм Саба районында узды. 

Бирегә республика­ның бар­лык якларыннан гаять зур дус команда – 600дән күбрәк кеше – баш мөхәррирләр һәм медиахолдинг филиаллары вәкилләре җыелды. Сабан туе мәйданда гармунга ку­шылып күңелле җырлар һәм такмаклар җырлый-җырлый бүләк җыю­дан башланды, ә аннары катна­шучылар парады узды. 
Тантаналы ачылышта Татарстан Республикасы әләме күтәрелде. ТР Дәүләт  Советы Рәисе ­урынбасары Марат Әхмәтов, Саба районы башлыгы урынбасары Расих Шакирҗанов бәйрәмдә катнашучыларга сәламләү сүзләре белән мөрәҗәгать итте.

 – Барлык редакцияләр килсен, үзләренең хез­мәттәшләре арасында үз­ләрен тәкъдим итсен­нәр өчен мондый төрдәге бәйрәм бер тапкыр да уздырылганы юк иде әле, – диде “Татмедиа” Рес­публика матбугат һәм ком­муникацияләр агентлыгы җитәкчесе Айдар Сә­лимгәрәев журналистларга мөрәҗәгать итеп. Ул үзенең чыгышында  мондый чараның Татарстанда беренче тапкыр гына уздырылуы хакында ассызыклады  һәм һәркемгә дә бәйрәмчә рух күтәренкелеге, бәйгеләрдә уңышлар теләде.   

Марат Әхмәтов ­Та­тар­стан җитәкчелеге исе­меннән сәлам­ләү сүзләре белән мөрәҗәгать итте. Марат Готыф улы туган телне саклау мәсь­әләләре буенча проектларны тормышка ашыруда бергәләп эшләүне югары бәяләп, болай диде:

– Без сезнең белән бергә рес­публикабызны бердәм гаиләгә берләштерәбез, ки­ләчәктәге иҗади хез­мә­тегездә уңышлар телим.

“Татмедиа” генераль директоры Шамил Садый­ков һәркемне бәйрәм бе­лән котлады һәм тырыш хезмәтләре өчен барысына да рәхмәт белдерде.  

– Журналист тормышы – тәүлек әйләнәсе. Ул беркайчан да ял итми. Бу безнең яшәү рәвеше. Журналист – ул иң кызыклы һөнәр, – диде ­Шамил Мөхәммәт улы. 

Республика шәһәр­лә­реннән һәм районнарыннан килгән йөзләгән журналист үзләренең каләмдә генә түгел, ә спортта да оста булуларын дәлилләп ярыштылар. “Авангард” газетасын тәкъдим итүчеләр – Елена Калашникова, Мәди­нә Ибәтуллина, Сания Сәми­гуллина, Энҗе Газизова, Вла­димир Майоров – мас-рест­лингта көч сынашты, канат тартышуда ярышты, бүрәнә кис­те, ласталар киеп, сулы чиләк аскан көянтәне күтәреп йөгерде, сумочылар, волейболчылар һәм көрәшчеләр булды, чүлмәк ватты һәм башка күңелле уеннарда җиңеп, бүләкләр алды.   

Барлык филиаллар арасында мас-рестлинг буенча 2нче урынны алган Энҗе Газизова генераль директор Шамил Садыйков кулыннан медаль һәм акчалата бүләк алды.   

Чара үзешчән сәнгать коллективлары һәм чакырылган артистларның концерт ­программасы бе­лән үрелеп барды. Фи­ли­алларның хез­мәт­кәр­ләре дә сәхнәдә үз­лә­ре­нең иҗади сәләтләрен күрсәттеләр. 
Бәйрәм ТР журна­лист­ларының зур һәм бердәм дус гаиләсен тагын да ­ныграк берләштерде.