Җимлекләр урнаштырдылар

(Тәтеш, 15 октябрь, “Тәтеш таңнары”).

Октябрь аеның болытлы кө­не. Без, журналистлар, кыргый хайваннарга һәм кошларга  җим­лекләрне ничек урнаштыруларын үз күзләребез белән күрер өчен, биоресурслар буенча ТР Дәүләт комитеты хезмәткәрләре һәм Кил­деш урта мәктәбе укучылары белән берлектә урманга юл тотабыз.  

Юлсыз җирләрдән урманга, пошилар һәм кыр кәҗәләре өчен алдан ясалган җимлекләр куелган урынга керәбез, ә куяннар кебек шундый аеруча да кечерәк җәнлекләр өчен җимлекләр машина багажнигында үз сәгатен көтә.

– Печән һәм тоз салынган җим­лекләр пошилар һәм кыр кәҗәләре өчен бил­геләнгән, куяннар өчен тоз салып куябыз. Җәнлекләрне ашату өчен акция көз айларында ел саен үткәрелә. Моңарда безгә ТР Урман хуҗалыгы министрлыгы, урманчылар, аучылар ярдәм итәләр, кыргый хайваннар ничек яшәвен һәм кышлавын белсеннәр өчен мәктәп укучыларын, студентларны да җәлеп итәргә тырышабыз, – дип аңлата Тәтеш районында дәүләт күзәтчелеге буенча районара бүлек начальнигы Сергей Кириллов.

Шундый мөһим сәбәп белән урманга бару Килдеш мәктәбе укучыларының күбесе өчен беренче тапкыр. Шуңа күрә балалар, тиешле урынга барып җиткәч, дәүләт комитетының тәҗрибәле хезмәткәрләрен игътибар белән тыңлыйлар, алар, үз чиратында, укучыларга җимлекләрне печән һәм тоз белән тутырырга тәкъдим итәләр.    

“ЦВИТОС” белгече Илнур Рә­химов участок урманчысы Дмит­рий Тойкин белән берлектә алдан ясалган җимлекнең өс­тен тент белән томалыйлар, бу еш явучан көзге яңгырлар җән­лекләргә салынган азыкны һәм минераль өстәмәләрне юешләмәсен өчен эшләнә. Бу шактый катлаулы хезмәт, моны әлегә мәктәп укучыларына ышанып ­тапшырмыйлар.

–     Акция Россиянең барлык төбәкләрендә үткәрелә. Җән­лек­­­ләр өчен җимлекләр ясаудан тыш, тәлләтәвеч, кыр тавыклары, көртлекләр  кебек шундый кыргый кошлар өчен дә вак таш-ком катнашмасы ясала. Тоз кыргый җәнлекләр һәм кошлар өчен зур әһәмияткә ия. Бу – минераль өстәмә азык, – дип сөйли “Долгая Поляна” ДТТ начальнигы Евгений Савельев.  

Чара ахырында дәүләт комитеты хезмәткәрләре тапшырган бүләкләр һәм грамоталар мәктәп укучылары өчен күңелле күренеш булды. 

– Урманга әти-әнием белән барам, ләкин мондый чарада – беренче тапкыр булуым. Кыргый җәнлекләрне кайгыртучы, аларны ашатучы мондый кешеләр булуы бик әйбәт, – дип уртаклашты мәктәп укучысы Арина Горбунова.