Күзләре начар күрүчеләрнең тормышын җиңеләйтү өчен

(Тәтеш, 2 июнь, “Тәтеш таңнары”). Сукырлар җәмгыяте рәисе Раиса Костягина дәрескә килүчеләргә мөрәҗәгать итеп, социаль про­ектның күзе күрмәүче һәм начар күрүче кешеләрне сенсорлы җайланмалардан визуаль бул­маган файдалануга өйрәтүгә юнәлдерелүе турында хәбәр итте.

Модератор Екатерина Деревенская күзләре начар күрү­че тәтешлеләр белән сенсорлы җайланмаларны куллану буенча мастер-класс үткәрде. Ул нинди төр­дәге смартфоннарның кушымталары сәламәт­лекләре буенча мөмкин­лекләре чикле кеше­ләр­нең көндәлек тормышын җи­ңеләй­тергә яр­дәм итүе хакында сөйләде.

Очрашуда катнашучыларның үзләренә дә кушымталарны кулланып карау тәкъдим ителде.

– Бик уңайлы, – дип уртаклашты Тәтештә яшәүче Илһам, – мин акча банкнотлары номиналын танып белергә өйрәндем.

Катнашучыларны волон­тер­ның онлайн рәвештә видеошалтырату вакытында өстәлдә нинди дару ятуын әйтүе хакындагы кушымта кызыксындырды. Өйрәнүчеләрнең социаль челтәрләрне файдаланып, “Авангард” газетасының бер төркеменә кереп яңалыклар блогын тыңлавы шактый мавыктыргыч булды. 

– Смартфоннар күзләре күр­мәүчеләрне һәм начар күрүче­ләрне тернәкләндерүдә алыштыргысыз чара булып тора, – дип басым ясады Екатерина Николаевна. – Гаджетлар ярдәмендә әйберләрнең төсләрен, акча купюраларын танырга, текстны укырга, дәүләт хезмәтләреннән файдаланырга, көнкүреш приборлары белән эш итәргә, әйләнә-тирәлектә йөрергә һәм башка бик күп нәрсәләргә өйрәнергә була. Сәламәтлекләре буенча мөмкинлекләре чикле кешеләргә үсеш алырга һәм заманча мобиль техникадан файдалана белергә кирәк. Районыбыздагы күзләре начар күрүче кешеләр сукырлар җәмгыятенә мөрәҗәгать итә алалар, анда мин аларга гаджеттан нәтиҗәле файдаланырга өйрәтүдә ярдәм итә алам.

ТР Хезмәт министрлыгының Тәтеш районындагы социаль яклау бүле­ге җитәкчесе Ольга Колсанова мастер-класс ахырында социаль проектны тормышка ашыру ярдәмендә, анда катнашучылар өчен яңа мөмкинлекләр ачылачагын, бу аларның тормышын яхшырак итәчәген билге­ләп үтте.