Александр Макаров парашюттан 107 тапкыр сикергән

(Тәтеш, 10 июнь, “Тәтеш таңнары”). 
1947 елда ул тугыз яшен­дә Людоговкадагы баш­лангыч мәктәпкә укырга бара. Җиденче сыйныфны тәмамлагач, Монас­тырскийдагы СПТУга укырга керә, анда бер ел укып чыга. Шуннан соң ул колхозда тракторчы булып эшли.  

1958 елның 15 ноябрендә яшь егетне Совет армиясе сафына чакыралар, ул һава десанты гаскәрләренә эләгә. Өч ел ярымга сузылган хәрби хезмәтне Александр Тулада үтә, бу вакыт эчендә аңа Кавказда да, Тверь өлкәсендә дә булырга туры килә.  

– Без өйрәнүләр үттек, парашюттан еш сикердек – кышын да, җәен дә. Начар һәм җилле һава торышы да комачау булырга тиеш түгел. Мәсәлән, мин беренче тапкыр сикергән көнне күк йөзе болытлы, томанлы иде. Әлеге вакыйга алдыннан ничек итеп борчылганымны, хәтта ике килограммга ябыгуымны хәтерлим, – дип елмаеп искә ала ир-ат.  

Александр ­Николаевич сөй­ләвенчә, алар гадәттә төрле само­летларда 2000 метр биеклектән сикергәннәр. Александр Макаров хәрби хез­мәт узган барлык вакыт эчендә парашюттан 107 тапкыр сикергән. 

– Бездә күңелсез очрак­лар да булды. Кыш, буран чыкты. Мондый һава торышында сикерергә ярамый иде, әмма боерыкны кире кагарга мөмкин булмады. Мин җиргә төшеп җиткәннән соң, миннән ерак түгел хезмәттәшемнең һәлак булганлыгын күрдем. Начар һава торышы үзенең фаҗигале ролен уйнады, – ди аянычлы итеп десантчы. 

Александр Макаровның хатирәләре буенча, икенче бер очракта сикергән вакытта десантчыларның берсенең парашюты ачылмаган. Аны аңа кадәр сикергән хезмәттәшенең парашюты гөмбәзенә утырып калуы коткарган. Алар икесе дә җиргә уңышлы, бернинди имгәнүләрсез төшеп җиткәннәр. 

– Мин үзем дә чак кына үлемнән калдым, – дип хәбәр итте тәтешле. – Шулай килеп чыкты, миңа чит кеше парашюты белән сикерергә туры килде. Очыш вакытында бары тик бер өлеше генә ачылды, ә икенче яртысы – берничек тә ачылмады. Бары тик җиргә төшеп җитәргә бераз гына калгач, гөмбәз тулысынча ачылды.  

Александр Николаевич, хәрби хезмәте тәмамлангач, 1962 елда Тәтешкә кайткан, автомәктәптә укыган һәм эшкә урнашкан. Ул “Татсельстрой” автобазасында, катнаш азык заводында хезмәт куйган. Хатыны Нина  белән өч бала тәрбияләп үстергәннәр, лаеклы ялдагы шәһәрлеләрне өч онык­лары һәм өч оныкчык­лары сөендереп тора.