Бергә яшәгән еллары алар өчен шатлык

(Тәтеш, 11 март, “Тәтеш таңнары”).

Зур Әтрәчтә яшәүче Ләбибә һәм Фәрит Миңнуллиннар быел гаилә тормышының алтын юбилеен билгеләп үтә.

Алар икесе дә шушы ­авыл­дан, күп балалы гаиләдән, авылдагы җи­ңел булмаган хезмәтне балачактан ук белеп үс­кән­­нәр. Яшьләр туган җир­ләренә булган яратуны йөрәкләрендәге ихлас хисләр белән ныгытканнар һәм анда үз тормышларын корырга булганнар. 
Ләбибә ханым колхоз фермасында 30 елдан артык сыер савучы булып хезмәт куйган, үз эшемне яраттым, ди ул.

– Тату эшләдек, сыер савучылар ул чагында 14 кеше иде, – дип искә ала Ләбибә Хәмәтвәли кызы. – Барысын да кулдан башкардык, аннары инде саву аппаратлары барлыкка килде, механикалаштырылды.

Гаилә башлыгы Фәрит Минһаҗ улы да гомере буе колхозда эшләгән, механизатор, шофер, комбайнчы, бригадир булган, авыл хуҗалыгындагы машина-трактор паркына мөдирлек иткән. Бернинди эштән дә курыкмаган, аны бөтен җаваплылык белән башкарган, хуҗалык җитәкчелеге аңа теләсә нинди эшне дә икеләнмичә тапшырып булуына чын күңелдән ышанган. Миңнуллиннар биш бала тәрбияләп үс­тергәннәр, аларның унике оныгы гаилә шәҗәрәсен тагын да тулыландырган. Төп нигездә уллары Радик яшәп калган, ул  җирле авыл хуҗалыгы предприятиесендә эшли, тиздән мәктәпкә барачак оныклары Радис – өлкән буын өчен зур шатлык. Калган балалары һәм онык­лары да кадерле кешелә­ре янына килеп йөриләр, аларны кайгырталар. 

Ләбибә һәм Фәрит Миң­нуллиннар эшсез утырып тора алмыйлар – өйдә һәм йорт тирәсендәге һәр җирдә чис­талык, пөхтәлек хөкем сөрә. Йорт хуҗалыгында сарыклар, мөгезле эре терлекләр бар, 50 куян асрыйлар, аларны үрчетү белән 30 елдан артык шө­гыльләнәләр. Гаилә башлыгы Фәрит Минһаҗ улы мал-туарны үзе карый, алар белән сөйләшергә ярата икән, терлекләр аны аңлыйлар дип белдерә. Сарыклар ит кенә түгел, шулай ук йоннары белән дә файда китерәләр. Йорт хуҗабикәсе йонны үзе эрли, алардан якыннары өчен җылы оекбашлар, бизәкле башмаклар бәй­ли, йон буыннарны да дәвалый, ди.  

– Өебездә барлык уңай­лылык та бар, рәхәтен күреп яшәргә дә яшәргә, хәрәкәт иткәндә авырулар да юкка чыккан кебек тоела. Ковидтан прививка ясаттык, әлегә авырганыбыз юк, сак­ланабыз, – ди Ләбибә Хәмәтвәли кызы. 

Авыл кешеләренең иркен, якты йортында төрле төс­тәге яран гөлләре чәчәк атып утыра, түр яктагы өстәлдә халык телендә “хатын-кыз бәхете” дип атап йөртелүче ап-ак чәчәкләр гүзәллек өстәп балкый.  

– Гаиләдә бер-береңә ярдәм итәргә, озак итеп ачу ­сакламаска, ике яктан да туганнарга хөрмәт белән ­карарга кирәк, шул чагында бергә яшәгән ­еллар ­шатлык кына булачак, – дип уртаклаштылар ­Ләбибә һәм Фәрит Миңнуллиннар.