Келәштән Рушан Копетдинов “Агроил” хуҗалыгында склад мөдире булып эшли

(Тәтеш, 13 март, “Тәтеш таңнары”). Келәштән Рушан Копетдинов “Агроил” хуҗалыгында склад мөдире булып эшли.

Ир-ат гомере буе туган авылында хезмәт куя. Келәштә колхоз булган чакта, Рушан Нуртдин улы товарлыклы-сөт­челек фермасына җи­тәкчелек иткән. Аның әйтүенчә, мөгезле эре терлекләрнең исәбе мең­гә кадәр җиткән, азык це­хы эш­ләгән. Коллектив дус, эш­чән, хезмәткәрләрнең исәбе – 30-35 кеше булган. 

Авыл кешесе хәзерге вакытта аларда яңа хуҗалык оешуына, кешеләрнең эшкә урнашу мөмкинлеге барлыкка килүенә сөенә. 
– Эш ел әйләнәсе диярлек бара, – ди Рушан Нуртдин улы. – Ындыр табагы территориясен яздан ук әзерли башлыйбыз. Апрельдә чәчүлек материалны агуларга керешәбез, бездә ул 300 тоннадан артык, бу сабан ашлыгы, арпа, көзге бодай. Складта шулай ук ашламалар, гербицидлар саклана. Ә инде уңыш өлгергәч, аны җыеп алганнан соң, игенне кабул итү алып барыла, алар ашлыкны чистарту машиналары аркылы чыгартыла. Иң мөһиме – чүпләрдән сыйфатлы итеп чистарту. Шулай да чәчүлек материалны сак­лау өчен планлы рәвештәге төпле эш алып барыла.

Тәҗрибәле хезмәткәр барысын да вакытында эшләргә, саклау технологиясен үтәргә кирәк, дип белдерә. Уңышны җыеп алгач, аңа шулай ук пайчыларга иген бирү вазифасы да йөкләнә. 

Хезмәткәр билгеләп үткәнчә, чәчүлек материал белән эшләү шактый тырышлык таләп итә, арыган чаклары да була икән, ләкин ул зарланмый, үсемлекчелекнең табышлы булуы күп яктан аның һәм хез­мәттәшләренең тырышып эшләвеннән торуын белә, чөнки сыйфатлы чәчүлек материал – булачак мул уңышның нигезе.    

– Әти-бабалар җирендә яшәве һәм эшләве бик әйбәт, әти миңа үз йортымны төзергә ярдәм итте, үз гаиләмне кордым, Келәштә яшәр өчен кирәкле барысы да бар, авыл яхшырганнан-яхшыра бара, сәламәтлек кенә булсын иде, – дип йомгаклады әңгәмәбезне аграрий.