Сания һәм Зө­фәр Загриевлар бергә гомер итүләренең 55 еллык үткәннәр

(Тәтеш, 27 февраль, “Тәтеш таңнары”).

Байраштан Сания һәм Зө­фәр Загриевлар бергә гомер итүләренең 55 еллык күркәм юбилеен билгеләп үткәннәр.

Алар икесе дә шушы авылдан, яшь чакларында әллә ни ерак яшәмәсәләр дә, бер-берсен белмәгәннәр дә диярлек.

– Зөфәр армиядән соң авылга кайтты, ә мин колхозда сыер савучы булып эшли идем инде. Бер-беребез белән 11 гыйнварда таныштык, ике көн ул мине өйгә кадәр озатып килде, ә 15 гыйнварда өйләнештек, никах укыттык, – ди Сания Гайфулла кызы. – Шуннан соң беркайчан да аерылышмадык. Төрлесе булды, әлбәттә, шулай да кеше янында беркайчан да ачуланышмадык, барлык мәсьәләләрне тыныч кына хәл иттек. Ничек шулай килеп чыгуына хәзер үзем дә гаҗәпләнәм – бер-беребезгә гашыйк булыр һәм язмышка ышаныр өчен безгә өч көн җиткән. Яшьлек...   

Ирем колхозда шофер, ә чәчү вакытында механизатор булып эшләде. Мин җиденче сыйныфтан соң фермага эшкә бардым, гомер буе сыер савучы булып эшләдем. Ферма, бергә эшләгән дусларым, сауган сыерларым әлегә кадәр төшемә керә, аларның исемнәрен дә хәтерлим.
Сания Гайфулла кызы әйтүен­чә, аның бөтен гомере хезмәттә узган, өендә балаларын кайгыртырга кирәк булган, гаиләдә алар бишәү, мал-туарлары күп булган – сыерлар, үгезләр, йөзәр тавык, каз, үрдәкләр асраганнар, йорт хуҗалыгында хәзерге вакытта кош-кортлар гына калган. Аяклары сынатса да, хәрәкәттә – бәрәкәт, хәрәкәт итәргә кирәк, дип саный өлкән буын ­Загриевлар. 
Аларның 11 оныгы, бер оныкчыгы бар. Әби якыннарын күңел җылысын биреп пешергән камыр ризыклары белән сыйларга ярата, алар өчен йомшак башмак­лар бәйли икән. Коръәнне һәм намазны ул күңел тынычлыгы һәм фарыз гамәл буларак укыйм, дип белдерә. 

Ир белән хатын язны, бакчага чыгарга, җирдә эшләргә, җиләк-җимеш агачларында бөреләр уянуына сөенергә мөмкин булган вакыт җитүен көтәләр. Зөфәр Сәлах улы Сабан туена хуш исле кыяр үстереп, туганнарын сыйларга тырыша.

– Язмыш күпме язган, шул­хәтле яшәячәкбез, якыннарыбыз исән-сау булса, без дә бәхетле булачакбыз, – дип уртаклаштылар ­байрашлылар.