Туган җирне яратып, хөрмәт итеп хезмәт куя

(Тәтеш, 15 апрель, «Тәтеш таңнары») “Колос”тан Юрий Мешков “Татарстан Республикасының атказанган авыл хуҗалыгы хезмәткәре” дигән мактаулы исемгә лаек булган.

“Әти мине кечкенәдән, үземне белгәннән бирле, үзе белән бергә кырга алып барды, ул танылган механизатор иде, – ди хөрмәт белән Юрий Николаевич. – Аңа ошыйсы килде”.

Авыл эшчәне, үзе теләгәнчә, әтисе сукмагыннан китә, һәм инде менә егерме елдан бирле районның агросәнәгать комплексында эшли, шуның уннан артыгын – “Колос”та. Аның җаваплылык өлкәсен бәяләп бетереп булмый, чөнки ул баш инженер вазифасын били, шунлыктан үсемлекчелек тармагы да, терлекчелек өчен барлык механизмнар да аның карамагында. Юрий Николаевич заманча техниканы һәм авыл хуҗалыгы производствосы технологиясен камил белә, аны яңалыклар кызыксындыра. “Безнең хуҗалык югары эшчәнлекле техникаларны һәм заманча җайланмаларны сатып алуга зур игътибар бүлеп бирә, – ди Юрий Николаевич. – Машина-трактор паркы елдан-ел зурая, терлекчеләрнең хезмәт шартлары яхшыра”. Ул шулай ук, авыл хуҗалыгы предприятиесе җитәкчелегенең үз хезмәткәрләрен шифаханәләргә, ял йортларына җибәреп, аларның сәламәтлеген даими кайгыртуы, авыр вакытларда ярдәм күрсәтүе турында уртаклашты.

Юрий Мешков үзенең тырыш һәм намуслы хезмәте өчен берничә тапкыр район һәм республика дәрәҗәсендәге грамоталар белән бүләкләнгән, 2017 елда “ТР агросәнәгать комплексының иң яхшы хезмәткәре” бәйгесенең “Иң яхшы инженер” номинациясендә җиңүче булган. “Юрий Николаевич – эш сөючән, җаваплы кеше. Аның ярдәмендә хуҗалык хезмәтне саклау буенча район смотрбәйгесендә берничә тапкыр җиңүче булып торды”, – дип тасвирлый хуҗалык җитәкчесе урынбасары Ранис Мәүлиханов үзенең ярдәмчесен. Хәзерге кызу эш вакытында язмабыз герое баштанаяк диярлек язгы кыр эшләренә чумган. Бүгенге төп бурыч, ул үзе белдергәнчә, – оптималь кыска вакытларда сыйфатлы итеп чәчү эшләрен тәмамлау, һәм техника сынатмасын.