Валерий Костюхинның машина йөртү стажы 36 ел тәшкил итә

(Тәтеш, 30 октябрь, “Тәтеш таңнары”).

Якшәмбе көнне бөтен ил автомобильчеләре үзләренең һөнәри бәйрәмен билгеләп үтә, алар исәбендә зур тәҗрибәле машина йөртүче Валерий Костюхин да бар.

Валерий Костюхинның тормышы юллар белән тыгыз бәйләнгән, шәһәр кешесенең машина йөртү стажы 36 ел тәшкил итә.

Мәктәптә укыганда ук ул мопедта “куарга” яраткан, аннары мотоциклы пәйда булган. Берәр нәрсәсе ватылса, аны дуслары белән ремонтлаган.

– Техниканы сүтеп җыю бик авыр эш түгел, тик ул эшләргә тиеш, – дип елмая ир кеше.
Авыл хуҗалыгы техни­ку­мында укыганда аны авто­мәк­тәпкә укырга җибәрәләр. Һәм юкка түгел – яр­ты елдан соң машина йөртү күнекмәләре һәм машина йөртү таныклыгы белән армиягә китә. Германиядә хезмәт итә, аңа ан­да төрле йөк ма­шиналары йөртергә туры килә, яну материаллары, сугыш кирәк-яраклары, башка йөкләр ­ташый.

Хезмәт иткәннән соң, туган шәһәре Тәтешкә кайта, янә руль артына утыра, комсомол райкомында, партия райкомында шофер бу­лып эшли һәм 32 ел район электр челтәрләрендә хезмәт куя.

– Башта миңа ГАЗ-66ны бир­деләр, бөтен район буенча бригада йөрттем, – дип сөйли Валерий Николаевич. – Ул вакытта көзге һәм язгы чорларда юллар бик үк яхшы түгел иде, кирәкле пунктка барып җитү өчен бер сәгать урынына дүрт сәгать тә бардык. Кайчагында юлда төн кунырга да туры килде – йә батып каласың, йә бензин бетә. Кышын юллар да кардан чистартылмаган була иде. Хәзер, әлбәттә, күңел сөенеп туя алмый, бөтен җирдән үтеп була.

Машина йөртүче махсус техника – 14 метрлы автокү­тәргечтә 2004 елдан алып эшли.
– Казанда өч ай ­курсларда укы­дым, таныклык алдым, – ди ул. – Өч ел инде 18 метр биек­лектәге яңа автовышкада эшлим, моңа кадәр 14 метрлы иде. Һәр иртә, юлга чыгар алдыннан, транспортның әзерлеген карыйм, тормозларны, фараларны, күтәрү механизмын тикшерәм, үземә ышанып тапшырган техника өчен җавап бирәм. Әле, әлбәттә, бергә эшләгән иптәшләремнең гомере һәм сә­ламәтлеге өчен дә җаваплымын, без­нең хезмәттә куркынычсызлык техникасын үтәү – мәҗбүри һәм беренче чиратта тора торган шарт.
Һава торышының теләсә кайсы вакытында монтерлар алган биремнәрне үти, күптән түгел алар Алабирдедә яңгырлар вакытында иске агач терәкләрне тимер-бетонга алыштырганнар. Шунысын билгеләп үтәргә кирәк, машина йөртүче ул вакытта кабинада утырмый – ярдәм итә: көрәк белән дә эшли, чыбыкларны да биреп тора. Барыбыз да дус, бер-беребезне яр­ты сүздән аңлыйбыз, ди ир кеше.

Валерий Николае­вич­ның эш­че­­ләр белән автовышкасын шәһәр­дә дә күрергә була: ­халык тор­мышы өчен куркыныч ту­­дыр­ган агачларны кисә­ләр, те­рәкләргә бәй­рәм декорация­ләре, иллюми­нация­ләр бер­ке­тәләр, ә шәһәрдә биек рай­он чыршысын урнаштырганда аннан башка ничек эш итә алсыннар соң!

Машина йөртүче эше зур игътибар һәм җыйнаклык, техник белем һәм көчле характер таләп итә, һәм бу сыйфатларның барысы да, җитәкче раславы буенча, безнең язма героенда бар.