Авылның киләчәге – яшьләр кулында

– Бүген авыл хуҗалыгы икътисадның төп тармак­ларының берсенә әве­релгәч, квалификацияле белгечләр мәсьәләсе аеруча кискен тора. Респуб­лика авыл хуҗалыгы һәм азык-төлек министрлыгы мәктәпне тәмамлаучыларга аерым игътибар бүлеп бирә, аларга кирәкле һөнәр алу өчен барлык шартларны тудыра, – ди районның авыл хуҗалыгы һәм азык-төлек идарәсе җитәкчесе Рәмис Гарипов.

Максатчан укыту турындагы шартнамәләр ни­гезендә кадрлар әзерләү – ул авыл хуҗалыгы оешмаларын барлык милек рәвешләрендәге яшь белгечләр белән тулы­ландыруның төп ресурсы. Механизмның асылы гади һәм үтә күренмәле. Мәктәпне тәмамлаучы заказ бирүче авыл хуҗалыгы предприятиесе белән ике яклы килешү төзи һәм укудан соң хуҗалыкта кимендә өч ел эшләү бурычын үз өстенә ала. 

Аннары абитуриент максатчан кабул итү квотасы буенча югары уку йортына,  көллияткә яки техникумга укырга керә һәм сайлаган профильле белгечлекне үзләштерә. Уку вакытында предприятие студентка өлгереш нәтиҗәләре буенча стипендия түли, практика өчен база һәм методик ярдәм күрсәтә. Ул уку йортын тәмамлагач, килешү төзелгән хуҗалыкта белгечлеге буенча эш ала.

– Предприятие, укыгач, авыл хуҗалыгы пред­приятиесендә кимендә өч ел эшләргә тиешле студентка стипендия түли, – дип аңлата Рәмис Гарипов. –  Аграр югары уку йортын яисә техникумны тәмамлаганнан соң өч ел дәвамын­да министрлык юлламасы белән авыл хуҗалыгы пред­приятие­ләренә эшкә килүче­ләргә бер мәртәбә 750 мең сум түләү каралган, шул вакытта хезмәткәрнең яше 35тән артмый. Шул ук вакытта төп шарт – хуҗалыкта кимендә өч ел эшләү.

Тәтеш районында шулай ук авыл хуҗалыгы предприятиеләрен яшь белгечләр белән тулыландыру буенча планлы эш алып барыла. Шәһәрле Андрей Максимов – шун­дыйларның берсе.

–  Авыл хуҗалыгы техникумын тәмамлагач, армиядә хезмәт иттем, өйгә кайттым. Узган елны “Содружество” хуҗалыгына гараж мөдире булып эшкә урнаштым. 750 мең сум күләмендә тиешле түләү алдым, эшләвемне дәвам итәргә планлаштырам, хезмәтем миңа ошый. Хәзер эшнең кызу вакыты –  техникаларны чәчүгә әзерлибез. Шулай ук агроном белгечлеге буенча югары белем аласым килә, максатчан юнәлеш буенча аграр университетта укыячакмын, – дип уртаклашты яшь белгеч.

Моннан тыш, яшь бел­гечләрне авыл җирендә калдыру өчен ярдәм программалары гамәлдә: “Авыл территорияләрен комплекс­лы үстерү” программасы буенча торак төзү һәм яшь гаиләләр өчен социаль ­ипотека.

Соңгы елларда дәүләт авыл хуҗалыгына җитди ярдәм күрсәтә. Яшьләр зур агрохолдингларда эшләп кенә калмыйча, үз эшләрен дә ачарга мөм­кин. Крестьян-фермер хуҗалыклары өчен грант ярдәме программалары, агротуризмны үстерү һәм башка юнәлешләр бар.

– Авылларда ел саен социаль объектлар төзелә, юллар төзекләндерелә, заманча балалар мәйдан­чыклары һәм ял итү зоналары барлыкка килә. Хезмәт сөючән һәм инициативалы яшьләр өчен биредә киң перспективалар ачыла. Сезнең белемнәрегез һәм талантларыгыз авыл хуҗалыгында гына түгел, ә теләсә кайсы башка тармакта да кирәк булачак,  иң мөһиме, туган җирдә эшләү һәм үсеш алу теләге булу, – дип басым ясый Рәмис ­Гарипов.

фото: Гүзәл Сумочкина