Биредә Кызыл Йолдыз булган...

(Тәтеш, 19 август, "Тәтеш таңнары"). Тарихчы-туган якны өйрәнүче Милица Иванова район картасыннан алынган Кызыл Йолдыз торак пункты турындагы мәгълүматны бер елдан артык җыйган.

Ул поселок ­хакындагы брошюраны бастырырга әзерләгән, ә узган атнада, аның урынында истәлек тактасы урнаштырылган.

Милица Николаевна әйтү­енчә, китап өчен мәгълү­матлар җыюда Кызыл Йолдызда яшәүчеләр һәм алар­ның туганнары ярдәм иткән, ә архив мәгълүматлары белән Тәтеш районы башкарма комитеты архив бүлеге булышкан. “Нигә мин әлеге эш белән шөгыльләнә башладыммы? Эш шунда, 1940 елда безнең бабай гаиләсе белән Чинчуринодан Кызыл Йолдызга күченгән.  Поселокта татарлар яшәгән, алар бердәнбер рус гаиләсе булган, һәм, туганнарымның хатирәләре буенча, барысы да тату гомер кичергән, – дип сөйли Милица Николаевна. – Торак пункт булган урынны без апам Наталья белән бергәләп эзләдек. Таптык. Калкулыкта истәлек тактасы урнаштырырга уйладык”.  Аның әйтүенчә, поселок­ның оешу датасы турында төгәл мәгълүмат юк, шулай да бу 1920 ел булган дигән фаразлаулар бар. 1935 елдан топография картасы һәм архив мәгълүматлары сак­лана, алардан күренгәнчә, поселокта “Кызыл Йолдыз” колхозы, ТСФ, мәктәп, 34 йорт хуҗалыгы, үзләренең гидроузеллары, бакчалары булган. 1940 елның августында егерме алты гаилә Карелия-Фин ССРга күченү турында карар кабул иткән. “Наталья Шлячкова мәгъ­лү­матлары буенча, поселоктан иң соңгысы булып 70нче елларда Сәйфиевлар гаиләсе Тәтешкә киткән”, – ди Милица Николаевна. 

Кызыл Йолдыз оешкан көннән алып бер гасыр узгач, тарихчы-туган якны өйрәнүче Милица Иванова туганнары белән бергә торак пункт урынына поселок хакындагы кыс­кача тарихи белешмә белән истәлек тактасы ­урнаштырган.