Дипломнар тапшырдылар

(Тәтеш, 16 сентябрь, "Тәтеш таңнары"). Тәтештә “Татарстандагы өлкән кешенең социаль портреты” VII республика бәйгесендә җиңүчеләрне һәм дипломга ия булучыларны бүләкләделәр.

Бәйге быел Бөек Ватан сугышында Җиңүнең 75 еллыгына һәм ТАССР төзелүнең 100 еллыгына багышланды. Аңа 80 эш тәкъдим ителгән иде, шуның 22се тәтешлеләр тарафыннан язылды. “Сугышның йөзе хатын-кыз түгел” номинациясендә Светлана Камфарова икенче урынны алды, ул Бөек Ватан сугышында катнашкан Анастасия Никоновна Ананьева турында эссе тәкъдим итте. Бәйгедә Евгения Кириллова Бөек Ватан сугышы ветераны Иван Николаевич Авдонин хакындагы аудиоэш, Любовь Врясова Врясовларның гаилә династиясе турындагы тәкъдим итү, Елена Калашникова хезмәт ветераны Зоя Германовна Волкова һәм рәсем тәкъдим иткән Вероника Мөбарәкшина хакындагы иҗади эш белән төрле номинацияләрдә дипломга ия булдылар. Тәтеш районында Россия пенсионерлар берлегенең җирле бүлек рәисе Нина Новикова “Татарстандагы өлкән кешенең социаль портреты” бәйгесендә актив катнашканы өчен ТР буенча Россия пенсионерлар берлеге төбәк бүлегенең Рәхмәт хаты белән бүләкләнде. Узган атнада шәһәрдәге кафеларның берсендә чәй өстәле янында очрашу булды, анда РПФның Тәтеш районы Идарәсе начальнигы Ирина Большакова бәйгедә җиңүчеләрне котлап, аларга дип­ломнар тапшырды, ә “Анданте” дуэты (Вера Скурихина белән Евгения Старшинина) музыкаль бүләк ясады. “Тәтешлеләр бәйгедә ел саен катнаша һәм һәрвакытта призлы урыннар ала. Бу районыбызда искиткеч кешеләр яшәве, алар турында язар әйберләр булуы, һәм авторлар моны яхшы итеп эшли алуы хакында сөйли”, – ди Нина Валентиновна.