Гореф-гадәтләр мәңгелек мирас булып калсын

(Тәтеш, 10 декабрь, “Тәтеш таңнары”). Без анда районның “Ак калфак” татар хатын-кызлары оешмасы җитәкчесе Рима Сафиуллова белән әңгәмә корып, татар халкының гореф-гадәтләре турында яктыртып, тарихи вакыйгалар, мәгълүматлар белән таныштырып барачакбыз.  

Сәхифәбезне халкыбызның бик матур йоласы “Каз өмәсе”ннән башлап җибәрәбез. 
“Мин үзем дә “Каз өмәсе”ндә катнашып, аның барлык неч­кәлекләрен дә беләм диярлек. Күп көч, вакыт сарыф итә торган авыр эшне күмәкләшеп эшләү тиз дә, җиңел дә. Игелек­ле һәм бердәм татар халкында кош-корт сугымын һәм йорт күтәрүне өмә җыеп эшлиләр, – ди Рима Гомәр кы­зы. –  “Каз өмәсе” гадәттә көз ахырында яисә кыш башында үткәрелә. Аның да үзенә генә хас тәртибе бар. Казлары күп кешеләр алдагы көннән үк туган-тумачаларына, күршеләренә өмә хакында хәбәр салалар.  Шулай ук яшь буынны да чакыралар, чөнки аларга да әлеге йоланы күңелләренә сеңдереп кую мөһим. Казлар йолкынып, эчләре алынып, аяк-башлары чистартыла. Эре канатлары сыдырыла, өмәгә килгән балалар алардан әби-апалар өйрәткәнчә, май канатлары ясый. Чистартылган казларны көянтә башларына элеп, салкын суда юарга алып бару – өмәнең иң күңелле вакыты дияргә мөмкин. Су буеннан кайтуга инде уңган хуҗабикәләрнең майда йөздереп пешергән “каз коймагы”, “каз боткасы” белән сыйлану, үзе бер күңелле мизгелләр. Гореф-гадәтләребез мәңгелек мирас ­булып калсын иде”.

Редакциядән: Быел көннәр ноябрь башында ук суы­тып җибәрде. Районыбыз авылларында яшәүчеләр өчен бу “Каз өмәсе”нә җыелып, үзләренең каз-үрдәкләрен кышкылыкка әзерләп куяр вакытны тизләтеп җибәрде. Зур һәм Кече Әтрәч, Келәш, Алабирде, Байраш, Бакырчы, кыскасы, районыбыздагы һәрбер татар авылында әлеге йоланы бик матур итеп дәвам итәләр. Ә “Тәтеш таңнары”, үз чиратында, бу хакта бик шатланып хәбәр итеп тора.