Гражданнар җыелышы: Бидәңге авыл җирлеге

(Тәтеш, 27 январь, “Тәтеш таңнары”). 

– Татар Бидәңгесе авылында яшәүчеләр үзара салым акчасын сарыф итүгә төп юнә­леш итеп урам юлларын ремонтлауны сайлады, акчаның бер өле­ше территорияләрне төзекләндерүгә тотыл­ды, – дип хәбәр итте җирлек башлыгы Гөл­наз Галиева. – Тө­зек­ләндерү – бу финанс­лар гына түгел, шулай ук кешелек факторы да. Алга таба ничек яшәячәгебез, балаларыбыз һәм оныклар нинди җәмгыятьтә үсәчәге безнең һәрберебезнең аерым һәм уртак көченә бәйле.  

Бидәңге ­авылы кирәк­ле бар­лык инфраструктурага ия, мәчет бар, анда ре­монт эшләре үткәр­гәннәр, күптән түгел газ казанын алыштырганнар. Район башлыгы Рәмис ­Сафиуллов мо­ның өчен үзенең яр­дә­мен күрсәткән. Автобус көндәлек эш тәр­тибе буенча, сишәмбе һәм якшәмбе көннәреннән тыш, даими рәвештә йөри. 

Бидәңгеләр үзара салым программасында 2016 елдан бирле катнаша, аның ярдәмендә рес­публика авылларга дүрт тапкыр күләмендә финанс ярдәме күрсә­тә. Җиде ел эчендә 839 500 сум җыелган, финанс­­лау исәбе белән гомуми сумма 4 197500 сум тәшкил иткән. Җирлек­тә яшәү­челәр шу­шы еллар эчендә авылда­гы тормышны, үз көч­ләрен һәм дәүләт ярдә­мен файдаланып, яхшы якка үзгәртеп булуына инанганнар, ә үзара салым программасы моңа булышлык итә.   

Узган елны 208 мең сум җыелган. Халыктан җыелган һәр сумга респуб­лика бюджетыннан дүрт сум өстәлгән. Юлларны ясауга һәм ремонтлауга, зиратны төзекләндерүгә, тармакланып үскән карт агачларны кисүгә 1 миллион 40 мең сум тотылган. Җирлек башлыгы әйтүенчә, программа буенча агымдагы елда җыелган акчаны файдалану планында, ә бу һәрбер кешедән меңәр сум дигән сүз, шулай ук юлларны норматив хәлгә китерү, Карл Маркс урамындагы асылмалы кү­перне ремонтлау, икенче зираттагы карт агачларны кисү буенча эшләрне дәвам иттерү. 

“Волга” авыл хуҗалыгы предприятиесе җитәкчесе Ринат Сибгатуллин аның узган елдагы эшчәнлеге турында сөйләде. 
Район башкарма комитеты җитәкчесе урынбасары Айрат Әхмәтшин районның үткән елдагы социаль-икътисади үсеш нәтиҗәләре, мәк­тәп­ләрнең, балалар бак­чаларының, ­медицина учреждениеләренең матди-техник базаларын ныгыту һәм башка күп эш­ләр турында бәян итте. 

Җыелышлар – район җитәкчелеге белән очрашып, үзеңнең сорауларны бирү өчен бер дигән мөмкинлек, кыскасы, би­дәңгеләр моңардан  файдаландылар да. Су белән тәэмин итү проблемасы узган еллардагы кебек көнүзәк булып кала: су басымы җитми. Бидәңге­ләр шулай ук Олы Тархан учас­­ток хастаханәсендәге ашы­гыч ярдәм филиалы хез­мә­тен яңадан торгызуны үтенәләр, чөнки кичек­мәстән ярдәм ки­рәк булган очракларда Тәтеш үзәк район хаста­ханәсеннән ярдәм килү соңарырга мөмкин.  
Барлык мәсьәләләр  контрольгә алынды.