Игътибар һәм кайгыртучанлык күрсәтәләр

Өлкәннәр көне якынлашканда без яшәү шартлары һәм сәламәтлек торышы аркасында социаль учреждениедә гомер кичерүче кешеләр өчен билгеләнгән Тәтеш интернат-йорты директоры Людмила Самаркина белән әңгәмә кордык. 
 
–     Людмила Георгиевна, интер­нат-йортның барлыкка килү ­тарихы турында сөйләгез әле.

– Агымдагы елда Тәтештәге карт­­лар һәм инвалидлар интернат-йорты ачылуга 30 ел тулды, ул гомуми типтагы интернат, 50 урынга исәпләнгән. Аның беренче җитәкчесе Борис Григорьевич Лашманов иде. 1995 елның июненнән Тәтеш картлар һәм инвалидлар интернат-йорты директоры итеп Зоя Германовна Волкова билгеләнде, ул әлеге вазифада 2007 елның сентябренә кадәр эшләде.   

– Сезнең учреждениедә бүгенге көндә ничә пенсионер яши?

– Хәзерге вакытта – 49 ке­ше, һәм аларның барысына да гарантияләнгән социаль хезмәтләр җыелмасы тулы күләмдә бирелә. Шулар­ның 47се – төрле чирләр төркемендәге инвалидлар, 25 кеше башкаларның даими каравына мохтаҗ һәм яши торган бүлмәләре буйлап кына хәрәкәтләнә, коляскадагы инвалидлар да бар. Яшәү бүлмәләре нигездә 3 – 4 кешегә исәпләнгән, җиһазлар, беренчел кирәкле әйберләр куелган, алар өй шартлары мохитенә туры китереп эшләнгән.   
 
– Яңа килүчеләрнең җайлашуы ничек бара? 

– Интернат-йортка килүче гражданинга җайлашып китүдә беренче чиратта безнең учреждение хезмәткәрләре ярдәм итә. Өлкән кешене күзәтү, биографиясен өйрәнү, кагыйдәләр һәм эчке тәртип белән таныштыру, аның ихтыяҗла­рын һәм мәнфәгатьләрен ачык­лау нәтиҗәләре буенча яшәү өчен уңайлы шартлар тудырыла. Бүлмәләргә урнаштырган вакытларда каршылыклар булмау, шәхесара мөнәсәбәтләр исәпкә алына. Шулай ук яңа килгән кеше кызыксынучанлыгы буенча түгәрәкләрдә һәм төркемнәрдә шөгыльләнүгә җәлеп ителә ­башлый.

–     Биредә яшәүчеләр янына туганнары һәм якыннары киләме?

–     Биредәгеләрнең күбесенең туганнары бар, алар һәрдаим килеп йөриләр, телефон һәм видеоэлемтә аркылы аралашалар, күчтәнәчләр белән посылкалар салалар. “Туган як” акциясе кысаларында туган якларына барулар, якташла­ры белән очрашулар оештырабыз. Алар янына бәйрәмнәрдә шулай ук Татарстанның төрле районнарындагы хакимият вәкилләре килә, бүләкләр тапшыра. 

– Сезнең карамактагыларның өйләренә кайтып китү очраклары булгалыймы?

– Социаль хезмәт алучыларның өйләренә кире кайтып китү очрак­лары бик сирәк, әйтергә ки­рәк, берничә генә. Мондый вакытларда җаваплылыкны ни­гездә  туганнары үз өстенә ала, чөнки безнең кул астындагыларга карау-тәрбия кирәк һәм аларның мөстәкыйль яшәве өчен үз-үзләренә хезмәт күрсәтүдә чикләүләр бар.

– Интернат-йортта яшәүче кешеләр ял итү вакытларында нәрсәләр белән шөгыльләнә?  

– Бу аларның психофизиологик мөмкинлекләреннән һәм мәнфәгатьләреннән тора. Төрле өстәл уеннары, шул исәптән рухи яктан үстерүчеләр дә киң кулланыла. Бүлмә һәм бакча үсентеләрен карап үстерергә яратучылар да бар. Учреждениедә активистлардан “Тимурчылар 55+” иреклеләр отряды оештырылды, алар учреждение тер­ри­ториясендә һәм теплицада булдыра алганча ты­рышып эшлиләр, саф һавага чык­­кан вакытта кыен хәрә­кәт­лә­нүче гражданнарны озатып йө­риләр, төрле чаралар уздыруда үзләреннән өлеш кертәләр. Календарь даталары буенча төрле чаралар үткәрелә. Социаль-тер­нәкләндерү максатларында төрле күнекмәләрне сак­лау яки торгызу буенча музыка уен коралларында уйнау, кулланма иҗат, шигырьләр сөйләү, җырлар һәм шаян такмак­лар җыр­лау оештырыла. Быел безнең учреждение базасында социаль хезмәтләр күрсәтү буенча республиканың башка районнарындагы хезмәттәшләр белән тәҗрибә уртаклашу максатларында “Өлкән гражданнарның һәм инвалидларның коммуникатив потенциалын арттыру техно­логияләре” темасы буенча өйрә­нү мәйданчыгы оештырылды.  

– Коллективта ничә кеше хезмәт куя һәм алар алдында нинди бурычлар тора? 

– Бүгенге көнгә бездә 29 хез­мәткәр. Бу бердәм гаилә һәм бер­дәм команда, алар бездә тәрбия­ләнүчеләргә уңайлыклар тудыру, игътибар һәм кайгыртучанлык күрсәтү, өлкән яшьтәге кешеләр үзләрен яшәештән чит­ләш­кән итеп тоймасыннар һәм үзлә­­рен бердәм гаилә әгъзалары итеп хис итсеннәр өчен тырышып эшлиләр.

– Киләчәккә планнарыгыз бе­лән дә уртаклашыгызчы.

– Безнең тормышка ашырырга теләгән планнарыбыз һәм идеяләребез әле күп. Интернат-йортның киләчәктәге үсеше уч­реж­дениенең матди-техник базасын камилләштерү, медик-социаль хезмәт күрсәтүләр өл­кә­сен киңәйтү, социаль проектлар эшләү һәм гамәлгә ашыру аркылы тәэмин ителүчеләрнең яшәеше өчен тагын да уңайлырак шартлар тудырудан гыйбарәт. Без үзебез үзгәрергә, безнең ка­рамак­тагыларның яшәү сыйфатын үзгәртергә һәм ­яхшыртырга әзер. 

– Әңгәмәгез өчен рәхмәт.

фотоны Тәтештәге карт­­лар һәм инвалидлар интернат-йорты тәкъдим итте