Җитештерү табышлы булырга тиеш

(Тәтеш, 2 февраль, “Тәтеш таңнары”).

“Бакырчы” авыл хуҗалыгы предприятиесе базасында район башлыгы Рәмис Сафиуллов рәислегендә район хуҗалыклары җитәкчеләре һәм белгечләре, авыл хуҗалыгы һәм азык-төлек идарәсе вәкилләре катнашында семинар-киңәшмә булды. Анда авыл хуҗалыкларының үткән елдагы эшләренә йомгак ясалды һәм агымдагы елга бурычлар билгеләнде.

Алгарышлы үсештәге “Бакырчы” предприя­тиесе җитәкче­се Илгиз Шәйхаттаров катнашучыларны се­ми­нар­ның гамәли өле­шен­дә авыл хуҗалыгы җитештерүенең икътисади күрсәткечләре белән кыс­кача таныштырып үтте, киләчәккә планнары белән уртаклашты. Ул ике мең квадрат метрга якын мәйданны биләп торган яңа азык җитештерү үзәгендә азык җитештерүнең барышы, мөгезле эре терлекләр өчен азык сак­лау һәм әзер­ләү шартлары хакында сөйләде. Товарлыклы-сөт­челек фермасы базасында ветеринария белгечләре мөгезле эре терлекләр­нең чирен профилактикалау һәм аларны дәвалау мәсьәләләре хакында фикер алыштылар.

Семинарның авыл мә­дәният йортында узган теоретик өлешендә үсем­лекчелек һәм терлекчелек буенча җитештерү күрсәткечләре ­каралды, һәрбер хуҗалык кыс­ка­ча анализланды. Бел­геч­­ләр җыелучыларның игъ­тибарын язгы чәчүгә бу­рыч­лар куюга, оригиналь һәм элиталы орлык­лар сатып алуга, тиешле күләмдә минераль ашламалар туп­лауга, туфракны известьлау, үсемлекләрне үстерү технологиясен, оптималь агротехник срокларда яз­гы кыр эшләрен башкару кирәклегенә юнәлттеләр. 

Шулай ук матди-тех­ник базаны ремонтлау, югары җитеш­терү­чәнлекле яңа техника сатып алу мәсьәләләре ­каралды. Рес­публикада ­Цифр­лаш­­тыру елы дип игълан ителгән агымдагы ел авыл хуҗа­лыгы тарма­гына да нәти­җәле яңа тех­нологияләр һәм цифр­лаштырулар кертүне күз уңында тота.

Сөт җитештерү өчен мөгезле эре терлекләр санын арттыру перспек­тивалары каралды, райондагы авыл хуҗалыгы предприя­тиеләренең икътисади үсешенә кагылышлы төгәл киңәшләр бирелде. Савым сыерларының баш санын 2022 ел ахырына кадәр 5150гә җиткерү бурычы куелды. 

Район башлыгы Рәмис Сафиуллов җитәкчеләр­нең игътибарын теләсә кайсы предприятиенең икъ­тисади файда белән эшләргә тиеш­легенә, ә үсемлекчелек һәр­вакытта да тотрыклы табыш гаранты булмаганлыктан, сөт җитештерүне көчәйтергә кирәклегенә юнәлтте. 

– Сөт – ул икътисади һәм социаль ныклык, – диде ул.

Рәмис Хатыйп улы шулай ук районның АСК хез­мәткәрләренең хез­мәт хакы күләменә дә басым ясады, авыл хезмәт­чәннәре үз хезмәтләре өчен лаеклы түләү алырга тиеш, дип билгеләп үтте.

– Авыл яшәргә тиеш, һәм сез моңа этәргеч бирергә, һәрьяклап ярдәм итәргә тиеш, – дип нәтиҗә ясады район башлыгы.

Семинарда катнашучылар әйтүенчә, ­мондый бай эчтәлекле семинарлар язгы кыр эшләрен башкарганда эшләү алымын һәм стратегияне чагыштыру, авыл хуҗалы­гы җитештерүчеләре­нең һөнәри белемлелеген арт­­тыру мөмкинлеген би­рә, димәк бу, районның агросәнәгать комплексы эшенең нәтиҗәлеле­ген арттыруга йогынты ясый.