Кемнең ничек эшләве күренә

Галина Захарова, Югары Тархан:
– “Авангард” газетасына 1991 елдан алып, кияүгә чыкканнан бирле язылып киләм. Мин тумышым белән Буа районыннан. Авыл хуҗалыгы турында уку бик кызыклы. Элек мин “Искра” колхозында идарәче идем, күрсәткечләребез начар түгел иде. Ул чакта терлекчеләр дә, механизаторлар да үзара ярышты, аларның рекордлары барысына да күренеп торды. Хәзер дә газета аша кемнең ничек эшләве күренә. Авыл кешеләренә афәрин – икмәк үстерәләр, сөт тә җитештерәләр. Әле тагын өлкән кешеләр хакында, нәрсәләр хәтерлүләрен, ниләр сөйләүләрен, шулай ук гаилә юбилейларын билгеләп үтүчеләр, аларның тормышы ничеклеге турында уку кызык. Абунә башлануын ишетүгә үк газетаны яздырдым, “Авангард” белән араны өзмим.