Контракт буенча хезмәт итү турында белделәр

Шәһәрнең үзәк паркында пат­риотик музыка астында авыл хуҗалыгы техникумы студентлары Тәтеш районы хәрби комиссары Фәнис Гарифуллин белән очрашты. Ул яшьләргә контракт буенча хезмәт итү өстенлекләре һәм шартлары, социаль ярдәм чаралары турында сөйләде.
Үзәк китапханә хезмәт­кәрләре һәр укучыга тапшырылган агитация материалларыннан хезмәт турында тулырак мәгълүмат алырга тәкъдим итте.

Техникум студенты Алексей Пигилов безнең белән туганы Евгений Подгорныйның ­Россия армиясе сафларында хезмәт итүе турында уртаклашты.

– Ул инде бер ел махсус хәрби операция зонасында, – диде Алексей. – Абый безнең белән телефон аша сөйләшкәндә, барысы да билгеләнгән тәртип буенча бара, ди. Иптәшләренең бурычларны үтәүләрен, җиңү безнең якта булачагын раслый. Без сугышчыларны хуплыйбыз, алар белән горурланабыз һәм булдыра алганча ярдәм итәбез.