Хәвеф-хәтәрләрне ничек киметергә һәм сыйфатны ничек арттырырга

Татарстан Рес­пуб­ликасының агросәнә­гать комплексы продук­циясенең иминлеген һәм сыйфатын бәяләү федераль үзәге филиалы директоры Татьяна Менликеева федераль дәүләт мәгълүмат системасының ашлыкка кагылышлы таләпләре, ашлык һәм аны эшкәртү продуктларын декларацияләү, бодайга дәүләт мониторингы, карантинлы продукцияне зарарсызландыру турында сөйләде.
– Быел да гадәттәгечә бодайга мәҗбүри мониторинг үткәрелә, ләкин үзгәреш бар: сез безгә кәгазьдә хәбәрнамәләр тапшырмаячаксыз, без мәгълүматны электрон рәвештә күзәтеп, үзебез сезгә чыгачакбыз. 
Игътибар итегез: дәү­ләт мониторингыннан башка сез ашлык партияләрен сата алмаячаксыз. Быел респуб­ликада экспорт потенциалын арттыру бурычы куелды һәм ашлык барлык күрсәткечләр буенча сыйфатлы булырга тиеш. 
Карантинлы продук­циягә килгәндә, фитосанитар карантин зоналары ачыкланган очракта, кимендә өч ел дәвамында ашлыгыгызны чыгара алмаячаксыз, бу зур финанс югалтуларына китерә. Моннан тыш, кайбер карантинлы чүп үләннәре көчле аллерген булып тора, бу кешеләр һәм хайваннар сәламәтлегенә тәэсир итә. Яз башланды, корткычлар уяна, алардан иген запасларына эшкәртү алып барырга кирәк, – дип билгеләп үтте Татьяна ­Константиновна.
карантинлы 
объектлар белән
эшләү 
Россельхознадзорның фитосанитар күзәтчелек, ашлык сыйфаты һәм орлык контроле бүлеге җитәкчесе Альберт Кадыйров карантинлы объект­ларның яңа очкыннарын булдырмау һәм аның таралуына юл куймау турында сөйләде, шулай ук карантинлы фитосанитар зоналарны бетерү тәртибен аңлатты.
–     Татарстан терри­ториясендә тугыз карантинлы объект ачыкланды. Карантинлы объект – ул Россия Федерациясендә булмаган яки чикләнгән рәвештә таралган зарарлы организм. Башкача әйткәндә, авыл хуҗалыгына зур зыян китерүче корткыч, авыру, бөҗәк яки чүп үләне. Республикада өч төрле амброзия,  куркыныч чүп үләне амброзиясе һәм повилика кебек үсемлекләр барлыгы ачыкланды. Узган ел ачыкланган 83 карантинлы зонаның өчесе Тәтеш районына туры килә. Карантинлы объектлар белән көрәш – бер тапкырлык чара түгел, ә сис­темалы эш, – дип басым ясады Альберт Фәрит улы.
Татарстан филиа­лының хайваннар сәла­мәтлеген саклау федераль үзәгенең әйдәп баручы белгече Динар Шәрәфетдинов контрольдәге продук­циянең иминлеген тәэмин итү турында сөйләде.

авыл хуҗалыгы 
продукциясе имин 
булырга тиеш
Россельхознадзорның ТР буенча дәүләт ветеринария күзәтчелеге бүлеге җитәкчесе Идрис Гатин “Семеноводство”, “Сатурн” федераль мәгълүмат сис­темалары таләпләре турында бәян итте, теркәлмәгән агрохимикатлар һәм инсектицидлар куллануны тыюга игътибар итте, шулай ук дератизация мәсьәләләрен карады. Ул мондый статис­тика китерде: 2024 елда продукциядә пестицидлар буенча 21 туры килмәү очрагы ачыкланган, ә узган ел бу сан 147гә җиткән. Ул препаратларның туфракта, суда, һавада җыелу үзенчәлеген исәпкә алып, аларны сайлаганда сак булырга, кешеләр һәм әйләнә-тирәгә игътибарлы булырга кирәк, дип ышанычлы итеп әйтте. Киңәшмәдә катнашучыларга пестицидлар кулланганда һәм умартачылык продукциясе әйләнешендә мәгълүматларны теркәү һәм кертү кагыйдәләре аңлатылды.

үсемлекчеләр һәм умартачылар арасында аңлашу булу мөһим
Докладта ­кырларны химик препаратлар белән эшкәрткәндә бал кортларын саклау мәсьәләләре дә күтәрелде. Баллы культураларның әһә­мияте, умартачыларны алдан кисәтү һәм регламентларны үтәү зарурилыгы әйтелде. Шулай ук авыруларны профилактикалау, һәлак булган бал кортларын һәм продукцияне лаборатор тикшерү турында искәртелде. Җирләрне эшкәртү барышы умартачылык белән тыгыз бәйле булу сәбәпле, пестицидлар һәм агрохимикатлар куллануны контрольдә тоту мөһим. Кырларны эшкәртү чорында умарталарны куркынычсыз урынга күчерергә киңәш ителде.
Россельхозцентрның район бүлеге җитәкчесе Радик Закиров энтомо­филь культуралар чә­чү структурасы һәм үсемлекләрне корткычлардан, чүп үләннәреннән һәм авырулардан саклаганда пестицидларны имин куллану турында сөйләде.
Тәтеш районы дәүләт ветеринария оешмасы җитәкчесе Мария Ванюхина районда умартачылык торышы, бал кортлары тоту кагыйдәләре һәм умарталарны паспортлаштыру кирәклеге турында чыгыш ясады.
Роспотребнадзор идарәсенең ТР буенча Буа территориаль бүлеге җитәкчесе урынбасары Олег Мазюкин пестицидлар һәм агулы химикатлар куллану шартлары белән таныштырды, шулай ук авыл хуҗалыгы хезмәткәрләренең медицина тикшерүе, геморрагик бизгәкне профилактикалау турында сөйләде.
Киңәшмә нәтиҗәләре буенча авыл хуҗалыгы җитештерүчеләре һәм умарта хуҗалары өчен тәкъдимнәр эшләнде. Алар бал кортларының үлү куркынычын киметүгә һәм бал продукциясенең сыйфатын арттыруга юнәлтелгән.

Фото нейрочелтәр ярдәмендә эшләнде