Кубокны кайтарырга вәгъдә иттеләр

(Тәтеш, 26 гыйнвар, “Тәтеш таңнары”). Тәтештә, “Барс” спорт-сәламәтләндерү комплексы базасында, Мөбин Корбан улы Әхмәтов истәлегенә шахмат турниры булды. 

Тәтеш, Буа һәм Югары Ослан районнарыннан интеллектуаль уен яратучылар Тәтеш районының шахмат йөреше энтузиас­тын искә алу һәм турнирны үткәрүне матур гадәткә кертү өчен очрашты.

Тәтешле Мөбин Әхмәтов район үсешенә һәм шахматны киң җәелдерүгә зур өлеш кертте. Интеллектуаль, тыйнак, итәгатьле шәхес – аны дуслары, хезмәттәшләре һәм танышлары шундый итеп хәтерлиләр.

Мөбин Корбан улы шахматка чиксез тугры булды. Аның инициативасы буенча, ул вакыттагы Тәтеш юл идарәсе җитәкчесе һәм төзелеп килгән 1нче урта мәктәп директоры Александр Самаркин вакытында, 27 ел элек Нәҗметдинов исемендәге Казан шахмат мәктәбенең республикадагы бердәнбер филиалы булдырылган иде. Аның директоры итеп педагог, шахмат һәм шашка буенча спорт мастерлыгына кандидат Александр Самаркинны билгеләделәр. Мөбин Әхмәтов, шулай ук спорт мастерлыгына кандидат, мәктәпнең иҗтимагый советына җитәкчелек итте. Акрынлап иҗади коллективы барлыкка килде. Тәҗрибәле тренерлар, үзләренең осталыклары белән уртаклашып, район һәм республика ярышларында катнашучы спортчыларны тәрбияләделәр, күрше районнардан килгән шахматчылар белән очраштылар. Рушания Цветкова җитәкчелегендәге Тәтешнең шахмат мәктәбе чирек гасырдан артык эшләү дәверендә спорт мастерлыгына 33 кандидат, 65 беренче разрядчы, массакүләм разрядлы спортчылар әзерләгән.

Район башкарма комитеты җитәкчесе урынбасары, үзе дә борынгы уенны яратучы Айрат Әхмәтшин турнирны ачып, матур традицияләр дәвам итсен, ә мәктәптә тәрбияләнүчеләрнең саны тагын да артсын, дигән теләген белдерде. Мөбин Әх­мәтовның улы, турнирның иганәчесе Марат Мөбин улы әтисе турында сөйләде, спорт ветераны Александр Самаркин дустының тормыш юлы турындагы хатирәләре белән ­уртаклашты.
Комплекс фойесындагы аклы-каралы такталар янында уйланучанлык, төгәллек мохите хөкем сөрде. Уенчыларның осталыгы шаккатырды. Балаларга, шулай ук өлкәннәргә дә үрнәк алырдай кешеләр бар. 
Уенның әйләнешле системасы, вакытка катгый контроль һәм махсус компьютер программасы иң көчлеләрне ачык­лады. Уен нәтиҗәләре буенча, өлкәннәр арасында барлык призлы урыннарны Югары Ослан районы вәкилләре алды. Алар шулай ук беренче гомумкоманда урыны өчен турнирның күчмә Кубогы белән бүләкләнде. Тәтешлеләр, буалылардан калышып, өченче урынны ­яуладылар.

Егетләр һәм кызлар арасында киеренке һәм көчле көрәш икенче катта да барды. Уен нәтиҗәләре буенча,  Тәтеш татар урта мәктәбе укучысы Ришат Әхмәтшин алтын медаль яулады. Буа районыннан Виктор Яковлев көмеш медальгә ия булды. Тәтеш кадеты Семен Костин һәм Тәтеш шәһәренең 2нче урта мәктәбе укучысы Никита Гришин бронза призерлар дип танылдылар. Елизавета Ахчина, Сабина Сәлахова, Гадел Хәмитов һәм Георгий Ерусланов үзләренең яшь категорияләрендә беренче урынны алдылар. Роксана Яковлева белән Юлия Торгашова – икенче урында. Нәфисә Фәтхлисламова, Арсений Ерас­тов һәм турнирның иң яшь катнашучысы Вера Ерусланова – өченче урында.

–     Шахмат уйнарга мине бабам Ильяс Акчурин өйрәтте, – дип уртаклашты татар урта мәктәбе укучысы Сабина Сәлахова. – Шахмат миңа тормышта ярдәм итә, стратегик фикер йөртергә өйрәтә, хәтерне яхшырта.  

Спорт ветераннары ча­ра ахырында бергә җые­лып һәм очрашу өчен бер-берсенә рәх­мәт белдереп, яңа очрашу хакында план ­кордылар. 
Тәтешлеләр исә кубокны кире кайтарырга вәгъдә иттеләр.