Җәй ахыры – җиләк-җимеш куаклары өчен аеруча мөһим чор

– Уңышны җыеп алганнан соң карлыган, крыжовник һәм кура җиләге куакларына киләсе сезонга чәчәк бөреләре салу, көчләрен торгызу һәм кышкы салкыннарга әзерләнү өчен ярдәм кирәк, – ди Россельхозцентрның Татарстан Республикасы буенча әйдәп баручы белгече Салават Галимҗанов. – Август аенда дөрес тәрбия өч мәҗбүри адымнан: куакларны дөрес итеп кисүдән, азотлы ашламаларны тулысынча туктатудан һәм фосфор-калийлы  тукландыруга басым ясаудан тора.

Җәйге кисү: куакны артык авырлыктан арындырабыз

Август аенда кисү – санитар һәм яшәртү максатыннан башкарыла торган процедура. Үсемлекләр әле дә актив вегетация чорында, шуңа күрә киселгән урыннар тизрәк төзәлә, ә куак үзендәге ресурсларны калган, киләчәктә уңыш бирәчәк ботакларның өлгерүенә юнәлтә.

Крыжовник һәм карлыган куакларын игътибар белән карап чыгыгыз. Иске ботакларны (каралган төстәге, кабыгы ярылган ботаклар), корыган һәм авыру ботакларны, шулай ук җиргә ятып торган яки куакның үзәген артык куерткан ботакларны тулысынча алып ташлагыз. Бу куакларның яхшырак җилләтелүен тәэмин итә һәм гөмбәчек авыруларының таралу куркынычын киметә.

Җәйге кура җиләгенең соңгы җимешләрен җыеп алганнан соң ук уңыш биреп бетергән икееллык үсентеләрне төбеннән үк кисеп алыгыз. Алар көрән төстә була. Киселгән урыннарда төпчекләр калдырмагыз, чөнки анда корткычлар ояларга ярата. Быел үскән яшь, яшел үсентеләрне калдырыгыз – киләсе ел уңышы нәкъ менә аларда өлгерәчәк.

Азотны чикләү: кышка әзерләнәбез

Үсемлекләрнең биологик сәгате тынычлык чорына әзерлек режимына күчә. Азотлы ашламалар белән тукландыруны тулысынча туктатыгыз, чөнки азот яшь, яшел үсентеләрнең актив үсешен көчәйтә. Алар салкыннар башланганчы агачсыманга әверелеп өлгермәячәк һәм кышын туңып өшиячәк. Бу исә куакның кыйммәтле көчен сарыф итеп, аның гомуми иммунитетын какшатачак.

Калий-фосфор тылсымы: ныгыту һәм тукландыру

Куаклар кышны уңышлы чыгып, киләсе җәйгә көчле чәчәк бөреләре булдыру өчен ике элементка – фосфор һәм калийга аеруча мохтаҗ. Фосфор тамыр системасының үсешен һәм ныгуын тәэмин итә, ә калий салкынга чыдамлылыкны арттыра һәм ботакларның өлгереп агачсыманга әверелүенә ярдәм итә. Һәр куак төбенә сыналган көзге ашлама катнашмасын кертегез: суперфосфат – озак вакыт дәвамында фосфор белән туклануны тәэмин итә; калий сульфаты (сернокислый калий) – җиләк-җимеш куакларына зарарлы хлор булмаган калийның идеаль чыганагы.

Ашламаларны дымлы туфракка, куак таҗы периметры буенча (сеңдерүче тамырлар урнашкан зонага) кертү яхшырак. Аларны 5–10 сантиметр тирәнлектә туфракка күмегез яки тизрәк үзләштерелсен өчен су эремәсе рәвешендә кулланыгыз. Бу гади эшләрне сентябрь башында  башкарып чыксагыз, киләсе сезонда карлыган, крыжовник һәм кура җиләге сезгә мул һәм эре уңыш белән рәхмәтен белдерер.