Помидорларны тукландыру

Үлән төнәтмәсе

Комплекслы ва­риант, аннан микро- һәм макро­элементлар күп булган төнәтмә килеп чыга.

Моннан тыш, бу фито­­фтороздан яхшы про­фи­лактик чара да.

200 литрлы мичкәгә вак­ланган биш чиләк яшел масса салалар. Иң яхшысы кычытканны гына алу, әгәр ул шулкадәр күләмдә бул­маса, теләсә нинди башка үлән белән тулыландыралар.

Шунда ук бер килограмм көл порошогы һәм вакланган чүпрә, ярты чиләк кош яки бер чиләк сыер тизәге һәм өч литр сөт сывороткасы салалар. Боларның барысы да җылы су белән кушыла, су мичкә тулганчы салынырга тиеш. Әчесен өчен атна ярым – ике атна көтәргә кирәк.
Савытны җылы урынга кую яхшырак. Вакыт-вакыт массаны болгаталар. Әзер сыеклыкны сөзеп, помидор  куакларының дымлы туф­рагына сибәләр. Бер куакка бер литр төнәтмә китә.

Йод

Даруханә йоды поми­дорлар  санын арттыра, алар­ның өлгерүен тизләтә, тә­мен татлырак итә. Аны сыек тукландыру буларак кулланалар.

Моның өчен бер чиләк суга 3 тамчы йод салалар, болгаталар, помидор төбенә сибәләр. 

Иң яхшы нәтиҗәне та­мырдан тыш эшкәртү бирә, ул өстәмә рәвештә фито­фтороздан саклый. Эремә: бер литр сөт сыво­роткасына яки сөткә 30 тамчы йод салалар, бер аш кашыгы перекись кушалар, болгаталар, 9 литр чиста су салалар. Бу сыеклык белән помидорларның яф­ракларын сиптереп чыгалар.

Чүпрә төнәтмәсе

Помидор куагы үсе­шенең төрле этапларында кул­ланыла торган чара. Чәчәк ату чорында аеру­ча нәтиҗәле. Аны сибеп кертәләр.
Бер литр җылытылган су алалар, аңа 100 грамм чүпрә салалар. Башта аларны, җиңелрәк эресен өчен, кисәкләргә ваклыйлар.
4 – 6 сәгать дәвамында төнәтергә куялар. Аннары төнәтмәгә ун литрга кадәр су салалар, болгаталар. Помидорларның дымлы туфрагына  сибәләр.
Чәчәк ата башлаганда бер куакка 500 миллилитр җитә. Помидорланган вакытта кабатларга мөмкин. Ул чагында төнәтмә дозасын икеләтә арттыралар.