Тәтеш хуҗабикәләре өйдә дә роллы ясыйлар

Роллы ясар өчен махсус норига тигезләп дөгене калак белән җәябез, аның өстенә вак итеп туралган яшел суган кыягы белән болгатылган йомшак сливочный сыр сөртәбез, аннан таякчыклап тураган кыяр яки авокадо, краб таякчыклары (тавык, балык яки креветкалар да ярый) салып чыгабыз. Норига рис сылаганда бер ягыннан бер сантиметр тирәсен җылымса су белән генә чылатабыз, ул әзер роллыны кысып әйләндереп, ябыштырыр өчен. Роллыны әйләрдереп рулет формасында төрер өчен азык пленкасы җәелгән яки махсус бамбук чыпта кулланырга була. Түгәрәк итеп яисә шакмак формада рулет ясарга да мөмкин. Эчлек өчен дә күңелегезгә якын булган, үзегезгә ошаган ризыклар кулланырга мөмкин.

Табага пергамент кәгазе җәябез. Шунда берәр рулетны тезәбез. Рулетны башта икегә бүлеп, аннары калган өлешләргә кисәсе. Пычакны суга манып кисегез. Рулет ватылмас.

Хәзер роллыга башлык, ягъни соус ясыйбыз: краб таякчыгын изәбез, майонез + 1 тырнак сарымсак + 1 чәй кашыгы кетчуп салып, туглыйбыз. Һәм роллылар өстенә салабыз. Кызу мичтә 5 минут тотасы.

Соя соусына манып ашыйбыз. Тәмле булсын! Кемгә ошый васаби, имбир белән ашарга була!