Детективлар, маҗаралар укыйлар

(Тәтеш, 24 март, "Тәтеш таңнары", Юлия КАЛИНИНА (автор фотосы)).Редакциягә шалтыраталар. “Безнең китапханәчебез шундый әйбәт, нинди генә китап сорасак та, һичшиксез китерә, – дигән тавышы ишетелде Валентина Долланың. – Һәм бу бары тик минем генә фикерем түгел, мин сезгә авылның барлык пенсионерлары исеменнән әйтәм”.

Китапханәче Людмила Шлячкова Тольяттида үсә, әмма балачакта еш кына Колунецка кунакка кайта, шуңа күрә күп балалы гаиләнең берничә ел элек авылга күченүе (ир белән хатынның өч баласы бар) аңлап һәм уйланып эшләнгән карары була.

Әгәр сез китапханәче күптәнге эш белән шөгыльләнә дип санасагыз, ул чакта нык ялгышасыз. “Минем һөнәр үзенчәлек­ле, күп төрле! Мин балалар, пенсионерлар, сәламәтлекләре буенча мөмкинлекләре чикле кешеләр белән эшлим, төрле чаралар үткәрәбез. “Кояшкай” балалар бакчасы һәм мәктәп коллективы белән бергәләп эшлибез. Кыскасы, һәрвакытта халык белән: кайгыда да, шатлыкта да. Барысы да детективлар, мәхәббәт романнарын укыйлар, җәен каникулга кайткан оныклары өчен еш кына балалар әдәбиятын сорыйлар. Һәр кешенең үз кызыксынуы бар. Колунец һәм Зеленовкага айга ике-өч тапкыр китаплар илтәм. Күбрәк кышын, эш азрак булганда, укыйлар”, – дип ихласланып сөйли үзенең китап сөючеләре һәм көндәлек хезмәте турында Людмила Александровна.
Авыл кешеләре арасында китап укырга хирыслар да бар. Пенсионер, элекке авыл Советы рәисе, Анатолий Шлячков – шундыйларның берсе. “Ул бик белемле кеше, аңа нинди генә сорау бирмәсеннәр – җавабы әзер, – дип тасвирлый өлкән ир-атны китапханәче. – Авылда әле тагын Дмитрий Володин да яши, мин аңа теләсә нинди мәгълүмат сорап мөрәҗәгать итәм”. Интернет барлыкка килгәч аз укый башладылар, әмма бөтен дөнья ятьмәсе басма сүзне беркайчан да алыштыра алмый. Шуңа да Людмила Шлячкова яңа чыккан һәм меңәрләгән кулда булган китапларны алып, укырга яратучылар янына ашыга, ә алар аны бик тә көтәләр.