Татарстан – нык гаиләләр территориясе

(Тәтеш, 19 сентябрь, «Тәтеш таңнары», Елена КАЛАШНИКОВА, автор фотосы). Бу проект күптәннән ачык мәй­дан­чыкка әйләнде, анда җәмгыять өчен абруйлы һәм яшьләр өчен үрнәк булып торган нык гаиләләр чыгыш ясый. Бәйгенең исеме Аб­дулла Алишның әкият герое – кайгыртучан ана һәм умарталар хуҗабикәсе Нечкәбил исемле эш­чән бал кортыннан алынган. Катнашучылар – гаилә учагын сак­лаучылар – тамашачылар һәм жюри әгъзалары алдына нәкъ тә менә шундый итеп килеп бастылар.

“Без кунакларга һәрвакытта сө­енәбез. Тәтеш җирендә төрле милләт вәкилләре дус һәм бердәм булып яшиләр. Бүгенге чараның гаилә кыйм­мәтләрен саклау үрнәге булачагына мин ышанам”, – дип мөрәҗәгать итте җыелучыларга рай­­башкарма комитет җитәкчесе Аркадий Семенычев.

Мәдәният йорты залында тама­ша­чылар хуҗабикәләрнең аш-су осталыгына сокланып, өстәлләрне карап хозурландылар: кы­зарып пешкән пироглар, тәмле кош теле, баллы чәк-чәк шактый заманча кабымлык­лар һәм бутербродлар белән күршелектә тордылар.

Һәрбер гаилә ТР Дәүләт Советы депутаты Анастасия Исаева һәм Рафил Ногуманов, “Нечкәбил” ана матурлыгы һәм гаилә республика бәйгесе җитәкчесе Изольда Жуй­кова, ТР хезмәт, мәшгульлек һәм социаль яклау министры урын­басары Юлия Абдреева һәм баш­калар составындагы таләпчән жюрины гаҗәп­ләндерә алды. 
Безнең районны бәйгедә Гөлчәчәк Зәйнуллина һәм Илдар Фәхретдинов гаиләсе тәкъдим итте. Алар балалары белән бергә, Әти көне бәйрәменә басым ясап, үз гаиләләрендәге күркәм йола хакында сөйләделәр. Гаилә башлыгы җыелучыларны гитарада уйнап җырлавы белән сокландырды, Гөлчәчәк татар телендә бик матур итеп җырлады, уллары Ирек – спорт, кызлары Яна иҗаттагы казанышлары белән сө­ендерде, ә иң кечкенәсе Полина тамашачыларны күбәләктәй очып биюе белән таң калдырды.

Югары Ослан районыннан Ка­расевлар гаиләсе “Якут пат­шабикәсе һәм Коргуз падишаһы турында әкият” күрсәтте, тама­шачылар Ка­ма Тамагы районыннан килгән Сай­киннар гаиләсе вә­килләре яр­дәмендә үткәннәргә кайтты һәм Алма спасы бәйрәме йоласы белән танышты, Буадан Талиповлар га­и­­ләсе белән бергә һәркем театр бу­фетына күз сала алды. Чүпрәле районыннан Фәткуллиннар бәйгегә бишек һәм җеп эрләгеч алып килгән, ул әлеге гаиләдә буыннан-буынга күчә бара икән.

“Татарстан – нык гаиләләр тер­риториясе”, – дип билгеләп үтте үзе­нең чыгышында Изольда Жуйкова.
Катнашучыларның чарага әзер­ләнүгә күп хезмәтләре киткән, әм­ма беркем дә бу хакта үкен­мәгәндер, мөгаен. Тырышып көч куеп уздырылган сәгатьләр һәм репе­ти­цияләр, киемнәр әзер­ләү һәм сый-нигъмәтләр пешерү бәяләп бе­тер­гесез. Туганнарың һәм якыннарыңның ярдәме, буыннарның какшамас элем­тәсе нәкъ тә менә шундый ва­кытта си­зелә дә инде.