Татар халкының бөек шагыйре һәм мәгърифәтчесе Габдулла Тукай туган көндә, 26 апрельдә, Татарстанда Туган тел көне билгеләп үтелә.
Республикабызда йөздән күбрәк милләт вәкиле яши, Тәтеш районында иң күп санда руслар, татарлар, мордвалар һәм чуашлар тату гомер кичерә. Аларның барысы да гореф-гадәтләрне, тормыш-көнкүреш мәдәниятенә һәм, әлбәттә инде, үзләренә якын туган телгә ия.
Гөлфинә Әмерханова:
"Минем уйлавымча, теләсә кем үз телен белергә тиеш. Аны белмәүче кеше - бу караңгылыкка очучы канатсыз кош. Минем туган телем - татар теле, без гаиләдә әлеге телдә сөйләшәбез".
Ирина Николаева:
"Балаларым рус һәм мордва телләрендә яхшы итеп, иркен сөйләшәләр. Аны буыннан-буынга тапшырып бару бик мөһим дип саныйм, моны ата-аналар эшләргә тиеш".
Алла Самойлова:
"Мин - рус. Туган телдә халыкларның гореф-гадәте, аның аерымлыклары, үзенчәлекләре чагыла. Моны белеп, без чын ватанпәрвәрләр булабыз. Ул безгә әби-бабаларыбыздан калган, шуңа күрә без аны кадерләргә һәм яратырга тиеш! Үз телеңне белү - димәк, үз халкыңны белү!"
Дарья Хафизова:
"Без - интернационал гаилә, нигездә рус телендә сөйләшәбез. Әмма иремә бала белән һәрвакытта татарча аралашырга әйтәм. Үзем рус милләтеннән, әбием - мордва, ләкин ул безнең белән балачакта мордвача сөйләшмәде, шуңа бу телне белмим".
Кристина Фомина:
"Чуаш теле - минем өчен туган тел. Әгәр үз телебезне белмибез икән, ул чакта аны балаларыбыз да белмәячәк, шулай итеп югалырга да мөмкин".
Татарстанда яшәүче төрле милләт вәкилләре арасында үзара аңлашу һәм хөрмәтнең гасырлар традициясе барлыкка килде. Туган тел көне һәркайсыбызга үзебезне халыкның бер өлеше итеп тоярга өстәмә мөмкинчелек бирә.
Нет комментариев