“Блокадалы Ленинград”

(Тәтеш, 1 февраль, «Тәтеш таннары», Сиринә СӘЙФЕТДИНОВА).  Районыбызның Байраш, Кече Әтрәч мәдәният йортларында, Бидәңге китапханәсендә, Зур Әтрәч, Алабирде мәктәп­ләрендә, Үтәмеш, Келәш мәктәп-бакчаларында шундый исем астында Батырлык дәресләре узды. 

Мәдәният хезмәткәрләре һәм укытучылар әйтүенчә, алар ­әлеге чарага гаять киң күләмле материаллар әзерләгәннәр. 

“Чарада мәктәп укучылары да, өлкән яшьтәге кешеләр дә  катнашты. Аларга “Блокададагы Ленинград балалары” дигән документаль фильм күрсәтелде. Халыкның ничек итеп ачлык-­ялангачлыкка бирешмичә, җиңүгә зур өлеш кертүләре, һәлак булган миллионлаган кешеләр язмышы хакында күп нәрсәләр сөйләдек”, –  диделәр мәдә­ният хезмәткәрләре.

“Башлангыч һәм өлкән сыйныф укучыларына Батырлык дәресләре уздырдык. Шуннан соң балалар белән әлеге елларның михнәт-газаплы көннәре хакында фикер алышу булды. Алар авырлыкларны җиңгән әби-бабайларының ­батырлыгын онытмыйлар”, – диделәр район педагоглары.