Игенчеләрнең төшке ашы музыка тыңлап узды

(Тәтеш, 30 июль, "Тәтеш таннары"). Мизгелнең мөһимлеген районыбызның мәдәният хезмәткәрләре дә аңлый. Район мәдә­ният йорты агитбригадасы һәр атна саен авыл хуҗалыгы пред­приятиеләренә концерт программасы белән чыга.

Бу юлы районның алдынгы хуҗалыкларының берсе булган “Нур” авыл хуҗалыгы предприя­тиесе басуы иҗат мәйдан­чыгы булды. Аның җитәк­чесе Радик ­Нургалиев сүзләренә караганда, би­ре­дә көзге бодайны җыеп бетергәннәр инде, быелгы һава шартлары өчен уңыш начар түгел – гектардан 30 центнердан артык.

– Төп бурыч – үсте­рел­гән уңышны вакытында һәм югалтуларсыз җыеп алу, – ди Радик Галимҗан улы.

Механизаторлар, кыйм­мәтле вакытны югалт­мас өчен, концертны төш­ке аш вакытында карадылар. Ләйсән ­Ильясова, Рамилә Хәйбуллина, Ил­һам Хәйбуллин, Алсу Ша­һи­әхмәтова һәм Ильнара Зәйнуллина туган җир­гә мәхәббәт темасына музыкаль номерлар башкардылар. Авыр, әмма намуслы хезмәтләре өчен авыл халкына әй­телгән рәхмәт сүзлә­ре дә бик урынлы булды. 

­Комбайнчы­лар сүзлә­ренә караганда, кеч­кенә генә музыкаль күренеш күңел күтә­рен­келеге биргән, шулай ук алар музыканы уңайлы ашлык җыю техникасы кабинасында тыңлар өчен видеоязмага да төшергәннәр.

Авыл хезмәтчәннәре дә бурычлы калмадылар. Авыл хуҗалыгы предприя­тиесе җитәкчесе Радик Нургалиев концерт өчен рәхмәт йөзеннән кулына гармун алды. Киң басу буйлап күңелле көйләр таралды, аңа кушылып Кече Әтрәч авылы мәдәният йорты директоры Хәлил  Мәгъсүмов биеп җибәрде, аннары артистлар игенчеләр белән бергә татар халык җырын башкардылар.

Кыска гына ял тәмам­ланды, комбайнчылар һәр минутның кадерен белеп, үз машиналарына ашыктылар, без аларга җиңел булмаган хезмәтләрендә уңышлар теләдек.