Күчтәнәчләргә һәркайсы сөенгән

(Тәтеш, 18 октябрь, "Тәтеш таңнары",Сиринә Сәйфетдинова). Күптән түгел генә биредә Тәтеш шәһәре аккалфаклары Асия Ибраһимова, Гөлчәчәк Зәйнуллина, Әтрәч җирлеге башлыгы Илнур Юнысов, җирлектәге “Кызыл миләш” ансамбленә йөрүче 10 мөслимә, авылның “Ак калфак” вәкилләре, мәдәният хезмәткәрләре, авыл активлары бик күп күчтәнәчләр төяп Өлкәннәр көне белән тәбрикләргә барды.

“Кызыл миләш”ләр чыгышын интернат-йорттагылар йотлыгып тыңлады. Үзешчәннәр Васыйл Юнысов белән Илһам Хәйбуллин, Тәнзилә Садриева белән Алсинә Фәйзуллина, Исламия Гыймранова, Гыйльман Хөснетдиновларның җырларын, Ләүһидә Заһидуллина белән Хәлил Мәгъсүмовның парлы биюен, Роза апа Фәйзуллинаның шигырен өлкәннәр алкышлап каршылады. Мәрзыя Юнысова камыр ризыклары пешереп алып барды. Ринат Минәев машина белән тәэмин итте. Күмәкләшеп бардык, күңел җирендә булды. Өлкәннәр  без киткәндә рәхмәт әйтеп калдылар, килүегезне көтеп калабыз диделәр”, – дип уртаклаштылар игелекле гамәл кылган райондашлар.  Сүз азагында әтрәчлеләр шатлыкларын җиткереп, өстәп болай дип тә әйттеләр:“Нур” хуҗалыгы җитәкчесе Радик Нургалиев та җирлектәге барлык өлкәннәргә күчтәнәч-пакетлар өләшеп чыкты. Хөрмәтебез әйтеп бетергесез, шулхәтле сөендек”.